19:56, 02 - تامىز 2023 | GMT +5
قارسىلاسىن جاراقاتتاپ العان تانىمال فۋتبولشى الاڭنان جىلاپ كەتتى - ۆيدەو
استانا. قازاقپارات - برازيليالىق تانىمال فۋتبولشى مارسەلو ليبەرتادورەس كۋبوگى ويىنىندا «ارگەنتينوس حۋنيورس» ويىنشىسى لۋسيانو سانچەستى ابايسىزدا اۋىر جاراقاتتاپ الدى. قارسىلاسىنىڭ جاراقاتىن كورە سالا ويىندى توقتاتقانمەن، ءبارى كەش ەدى.
تورەشى مارسەلوعا قىزل قاعاز كورسەتىپ، الاڭنان قۋدى. ال برازيليالىق ويىنشى كوز جاسىنا ەرىك بەرىپ، تورەشىنىڭ شەشىمىنە نارازىلىق بىلدىرگەن جوق. كەرىسىنشە ءوزىنىڭ ءساتسىز قيمىلىنا وكىنگەن قالپى الاڭنان كەتتى.
جەرگىلىكتى باسىلىمداردىڭ جازۋى بويىنشا، لۋسيانو سانچەستىڭ الاڭعا قايتا ورالۋىنا كەمى 1 جىل ۋاقىت قاجەت.
مارسەلو قازىرگى تاڭدا برازيليانىڭ «فلۋمينەنسە» كلۋبىندا وينايدى. وعان دەيىن گرەكيانىڭ «وليمپياكوس» كومانداسىندا دوپ تەپتى. ال جانكۇيەرلەر ونى «رەال مادريد» ساپىنداعى جارقىن ويىنىمەن جاقسى تانيدى.
