كوپقاباتتى تۇرعىن ۇيدە ءورت شىقسا، نە ىستەۋ كەرەك؟

استانا. قازاقپارات - كەشە الماتىدا تۇرعىن ءۇي كەشەندەرىنىڭ بىرىنەن ءورت شىعىپ، ءبىر ادام قازا تاۋىپ، بىرنەشە ادام جاراقات الدى.
None

توتەنشە جاعدايلار مينيسترلىگى وكىلدەرى توتەنشە جاعدايدا تۇرعىندار قالاي ارەكەت ەتۋ كەرەك ەكەنىن ايتتى، - دەپ حابارلايدى Massaget.kz ءتىلشىسى.

بۇعان دەيىن الماتى ت ج د باستىعىنىڭ مىندەتىن اتقارۋشى پولكوۆنيك ەرلان الىبەكوۆ تەرەزەدەن سەكىرگەن ادامدار قاتە جىبەرگەنىن، ءورت كەزىندە ەڭ باستىسى - سابىر ساقتاۋ ەكەنىن مالىمدەگەن بولاتىن.

«ءورت شىققان كەزدە، بىرىنشىدەن، سابىر ساقتاۋ كەرەك. ونىڭ ورنىنا 101 گە، 112 گە حابارلاسۋ كەرەك. مۇمكىندىگى بولسا، كورشىلەرگە حابارلاۋ قاجەت. ال ارى قاراي قاۋىپسىز جەرگە شىعۋ كەرەك. ادامدار قورىققاننان سەكىرگەن. ونىڭ ورنىنا قۇتقارۋشىلار كەلگەنشە، ەسىكتەردى جاۋىپ، ءتۇتىن كىرەتىن جەرلەردى دىمقىل شۇبەرەكپەن بىتەپ، تازا اۋا كىرەتىن جەردە بولعان دۇرىس»، - دەدى الماتى ت ج د وكىلى دانيار ءجۇسىپوۆ.

كوپقاباتتى تۇرعىن ۇيدە ءورت شىققان جاعدايدا تۇرعىندار قالاي ارەكەت ەتۋى كەرەك؟

ت ج م ينسترۋكتسياسىن جاريالادى:

ءورت ءسوندىرۋ بولىمىنە، «101» قۇتقارۋ قىزمەتىنە، «112» تەلەفونى بويىنشا دەرەۋ قوڭىراۋ شالىڭىز؛

دۇربەلەڭگە تۇسپەي، سابىرلى بولىڭىز جانە ۇيىمشىل ارەكەت ەتىڭىز، وتتىڭ جولىن جابۋ ءۇشىن ەسىكتەردى مىقتاپ جابىڭىز؛

ەگەر ءورت ەندى عانا باستالسا، سۋمەن ءسوندىرىڭىز، قالىڭ كورپەمەن ءورتتىڭ بەتىن جابىڭىز؛

ەشقانداي جاعدايدا جانىپ تۇرعان ەلەكتر سىمدارى مەن ەلەكتر قۇرىلعىلارىن سۋمەن سوندىرمەڭىز، بۇل ومىرگە قاۋىپتى؛

ەگەر ءسىز ءورتتى سوندىرە المايتىنىڭىزعا كوز جەتكىزسەڭىز، بولمەدەن شۇعىل تۇردە شىعىڭىز.

ەشقاشان ءتۇتىندى بولمەدە وقشاۋلانعان جەرلەردە (شكافتاردىڭ ءىشى، توسەكتىڭ استى) جاسىرىنباڭىز؛

ءتۇتىن جايلاعان بولمەدە قالىپ قويساڭىز مۇمكىندىگىنشە ەدەنگە جاقىنداڭىز، ءتۇتىن از بولادى؛

باعىتتى جوعالتىپ الماۋ ءۇشىن قابىرعالاردى ۇستاپ شىعۋ ەسىگىنە قاراي ءجۇرىڭىز؛

ىلعال شۇبەرەكپەن تىنىس الۋ جۇيەلەرىن جاۋىپ دەم الىڭىز.

ليفتتەردى پايدالانباڭىز، باسپالداقپەن تومەن ءتۇسىڭىز.

ەگەر ءورت شىعۋ جولىن كەسىپ تاستاسا، ەسىكتىڭ ساڭىلاۋلارىن دىمقىل شۇبەرەكپەن بىتەڭىز، تەرەزەدەن كومەك سۇراڭىز.

«ەسىڭىزدە بولسىن، ءورتتى سوندىرۋدەن گورى الدىن-الۋ وڭاي، ال كىشكەنتاي جالىن ۇلكەن قيىندىققا اينالۋى مۇمكىن!» - دەپ ەسكەرتتى ت ج م وكىلى.

ەسكە سالايىق، كەشە الماتىداعى اقكەنت شاعىناۋدانىنداعى تۇرعىن ۇيدە ءورت شىققانى حابارلاندى. كەيىن ورتتەن زارداپ شەككەندەر سانى انىقتالدى.

اقكەنت تۇرعىن ءۇي كەشەنىنىڭ تۇرعىنى ءديدار ورت تۋرالى ايتتى. ول - ورتتەن امان قالعان تۇرعىنداردىڭ ءبىرى. ال تىلەۋجان احمەتجان ەسىمدى جىگىت ورتتەن 6-7 ادامدى قۇتقارىپ العان. ەر ادام 1 جاسار بالانى، كورشىنىڭ وتباسىن، ءبىر جىگىتتى جانە پوليتسيا قىزمەتكەرىن امان الىپ قالدى.

ال تۇركيا ازاماتى شۇكۇر گيۋناي اقكەنتتەگى ءورت كەزىندە 16-قاباتتا قالعان بالالاردى قۇتقارعان.


سوڭعى جاڭالىقتار