پاۆلوداردا سوققىعا جىعىلعان جاس ءوسپىرىمنىڭ وتباسىنا جان-جاقتى كومەك كورسەتىلەدى - وبلىس اكىمى

بۇل تۋرالى وبلىس اكىمى ءوزىنىڭ Instagram پاراقشاسىندا جازدى، دەپ حابارلايدى قازاقپارات.
«بۇگىن مەن اپپاراتتىق جينالىستىڭ جابىق بولىگىندە پاۆلودار قالاسىندا وقۋشىنى جابىلىپ ۇرىپ-سوعۋ وقيعاسى بويىنشا سۇراقتى قوزعادىم. اتا-انا رەتىندە مەن بۇعان بەي- جاي قاراي المادىم، سوندىقتان، پوليتسيا دەپارتامەنتى مەن وبلىستىڭ ءبىلىم باسقارماسىنىڭ باسشىلىعىنا ورىن العان جاعدايدى تەرگەۋ بارىسىمەن مەنى حاباردار ەتىپ وتىرۋدى تاپسىردىم. جينالىستان كەيىن كۇدىكتىلەر مەن زارداپ شەككەن بالالار وقيتىن مەكتەپتەردىڭ بىرىنە بارىپ، پەداگوگتارمەن سويلەستىم، مەملەكەتتىك ورگاندارعا زارداپ شەككەن بالانىڭ وتباسىنا جان-جاقتى كومەك كورسەتۋدى تاپسىردىم. مۇنداي فاكتىلەر ءبىزدىڭ قوعامدا ۇيرەنشىكتى جاعدايعا اينالماۋى كەرەك. ونداي جاعدايلاردى تۇبىمەن جويۋ، بالالاردى مەيىرىمدىلىككە، ادالدىققا جانە ادىلەتتىلىككە تاربيەلەۋ - ءبىزدىڭ باستى مىندەتىمىز»، - دەپ جازدى اسايىن بايقانوۆ.
ايتا كەتەيىك، 24-شىلدە كۇنى كەشكى ساعات 20:30-دا پاۆلودار كوشەلەرىنىڭ بىرىندە توبەلەس بولعان. وندا 14 جاستاعى جاس ءوسپىرىم زارداپ شەكتى، ول وبلىستىق بالالار اۋرۋحاناسىنا جەتكىزىلدى.
ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى بولعان وقيعا بويىنشا پىكىر ءبىلدىردى.
سونداي-اق اتالعان كوميتەت وسى ءىستى ءوز باقىلاۋىنا الدى.