قازاق سۋرەتشىلەرى قيعاش وزەنىندەگى الىپ گۇلدى كەنەپكە بەينەلەپ جاتىر - فوتو

اتىراۋ. قازاقپارات - اتىراۋدا 4 ءوڭىردىڭ سۋرەتشىلەرى سۋ ۇستىندە ءوسىپ تۇرعان لوتوستى كەنەپكە بەينەلەپ جاتىر، دەپ حابارلايدى قازاقپارات ءتىلشىسى.
None

سۋرەتشىلەردىڭ رەسپۋبليكالىق پلانەرى «سۋ ۇستىندەگى سۇلۋلىق» دەپ اتالعان. ش. ساريەۆ اتىنداعى كوركەمسۋرەت جانە قولدانبالى ساندىك ونەر مۋزەيىنىڭ ۇيىمداستىرۋىمەن ءوتىپ جاتقان پلانەرگە الماتى، قىزىلوردا، اقتوبە جانە اتىراۋ وبلىسىنان 10 قىلقالام شەبەرى قاتىسۋدا.

مۋزەي باسشىسى تولەگەن ورىنباسار ۇلىنىڭ ايتۋىنشا، سۋرەتشىلەر قۇرمانعازى اۋدانىنداعى قيعاش وزەنى ۇستىندە وسەتىن لوتوستى كەنەپكە بەينەلەۋدە.

«قيعاش وزەنىنىڭ ۇستىندە لوتوس گۇلدەيدى. ونى تەك قازاقستاندىقتار عانا ەمەس، وزگە ەلدەردىڭ تۋريستەرى دە قىزىعا تاماشالايدى. سول سەبەپتەن، سۋ ۇستىندەگى سۇلۋلىقتىڭ سۋرەتشىلەردىڭ قىلقالامىنا ارقاۋ بولعانىن قالادىق»، - دەيدى تولەگەن ورىنباسار ۇلى.

ونىڭ سوزىنشە، 4 تامىزدا اتالعان مۋزەيدە لوتوستى بەينەلەگەن سۋرەتشىلەردىڭ كورمەسى وتەدى.

لوتوس - قيعاش وزەنىنىڭ ساعاسىندا عانا گۇلدەيتىن سيرەك وسىمدىك. ال قيعاش وزەنى اتىراۋ وبلىسىنىڭ قۇرمانعازى اۋدانى مەن رەسەيدىڭ استراحان ءوڭىرىنىڭ شەكاراسىندا اعىپ جاتىر.

قيعاش وزەنىنە «اقتوبە - اتىراۋ - رەسەي فەدەراتسياسىنىڭ شەكاراسى» باعىتىنداعى جولمەن جەتۋگە بولادى. اتىراۋدان اراقاشىقتىق - 300 شاقىرىمعا جۋىق.

قىزعىلت ءتۇستى، بيىكتىگى 150 سانتيمەترگە دەيىن جەتەتىن لوتوس 5 مىڭ گەكتارعا جۋىق اۋماقتا گۇلدەيدى. سۋ ورتاسىندا تاڭەرتەڭ قاۋىزىن اشىپ، كەشكە قايتا جابادى.

بۇل گۇلدى ۇندىستەر مەن ۆەتنامدىقتار تازالىقتىڭ سيمۆولى رەتىندە باعالايدى. ءتىپتى ونىڭ ەمدىك قاسيەتى بار دەپ ەسەپتەلەدى. تۇقىمىنداعى اقۋىز بۇيرەك پەن كوكباۋىر، جۇرەك اۋرۋى مەن ۇيقىسىزدىقتى ەمدەۋگە قولدانىلادى.

ەسكە سالا كەتەلىك، بىلتىر اتىراۋ وبلىسىنداعى قيعاش وزەنىنىڭ ساعاسىندا لوتوس گۇلدەگەنىن جازعان ەدىك.


سوڭعى جاڭالىقتار