تۋعان ءسابيىن ولتىرگەن اقتوبە تۇرعىنى ءومىر بويىنا باس بوستاندىعىنان ايىرىلدى

اقتوبە. قازاقپارات - ءوزىنىڭ 4 جاسار بالاسىن ءولتىردى دەپ ايىپتالعان ارتۋر احۋنوۆ ءومىر بويىنا باس بوستاندىعىنان ايىرىلدى.
None

بۇگىن اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا سوت ۇكىمى وقىلدى، دەپ حابارلايدى قازاقپارات ءتىلشىسى.

ارتۋر احۋنوۆ قىلمىستىق كودەكستىڭ 99-بابى 3-بولىگىمەن ايىپتى دەپ تانىلىپ، ءومىر بويىنا باس بوستاندىعىنان ايىرۋ جازاسى تاعايىندالسىن. جازاسىن قاۋىپتىلىگى بارىنشا جوعارى تۇزەتۋ مەكەمەسىندە وتەسىن. مۇنداي جاعداي قايتالانباس ءۇشىن وبلىستىق پوليتسيا دەپارتامەنتىنىڭ باستىعىنا، وبلىستىق ءبىلىم باسقارماسىنىڭ باسشىسىنا جەكە قاۋلى شىعارىلدى. ولار اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىنا شەشىم تۋرالى حابارلاۋى ءتيىس، - دەدى سۋديا نۇرلان باقتىعالييەۆ.

تاراپتار 15 كۇندە اپەللياتسيالىق شاعىم تۇسىرە الادى.

ەسكە سالساق، بىلتىر 4 جاسار دانيل احۋنوۆتىڭ جولعالىپ كەتكەنى تۋرالى پوليتسياعا حابار ءتۇسىپ، ىزدەۋ جۇمىستارىنا ەرىكتىلەر دە ارالاستى.

كەيىن پوليتسيا بالانىڭ اكەسىن قاماپ، دەنەسىن قايدا كومگەنىن انىقتادى.

بۇعان دەيىنگى سوت وتىرىسىندا سوتتالۋشى ارتۋر احۋنوۆ ءبارى دە جازاتايىم وقيعا ەكەنىن، بالالارى توبەلەسكەندە دانيلدىڭ قۇلاپ، باسىن جارالاعانىن العا تارتتى. پروكۋرور جارىسسوزدە ءومىر بويى باس بوستاندىعىنان ايىرۋدى سۇرادى.

ال، بۇگىن تۇسكە دەيىن سوتتالۋشى ارتۋر احۋروۆ سوتتا سوڭعى ءسوزىن ايتتى.

«بالام دانيلدىڭ ولىمىنە كىنالى دەپ تانىماۋىڭىزدى سۇرايمىن. مەن بار بالامدى جاقسى كورەمىن. ماعان مۇمكىندىك بەرىپ، جاعدايدى وزگەرتۋگە بولادى دەپ ويلايمىن. ەكى بالام بار. انام ينسۋلت العان. بار ءومىرىمدى اناما، بالالارعا ارناعىم كەلەدى. مەنىڭ ءسوزىمدى ەستيسىز دەپ ويلايمىن»، - دەدى سوتتالۋشى ارتۋر احۋنوۆ.


سوڭعى جاڭالىقتار