بوكسشى بەيبىت شۇمەنوۆكە قاتىستى داۋدان كەيىن ەلوردا پوليتسەيلەرى جازالاندى

استانا. قازاقپارات - ەلورداداعى ساۋدا ءارى ويىن-ساۋىق ورتالىعىندا بولعان بۇزاقىلىق فاكتىسىنەن كەيىن بوكسشى بەيبىت شۇمەنوۆتىڭ ىسىنە قاتىستى تەكسەرۋ جۇرگىزىلىپ، قىزمەتىنە سالعىرت قاراعان پوليتسەيلەر جازالاندى.

بۇل تۋرالى قالالىق پوليتسيا دەپارتامەنتىنەن ءمالىم ەتىلدى، دەپ حابارلايدى قازاقپارات ءتىلشىسى.

تەكسەرۋ قورىتىندىسى بويىنشا ەسىل اۋدانى پوليتسيا باسقارماسىنىڭ ۋچاسكەلىك ينسپەكتورى قىزمەتىنەن بوساتىلدى.

جەرگىلىكتى پوليتسيا قىزمەتى بولىمشەسىنىڭ كەزەكشىسى جانە پوليتسيانىڭ اعا ۋچاسكەلىك ينسپەكتورى قىزمەتتىك تالاپتاردى تولىق ورىنداماعانى تۋرالى ەسكەرتۋ الدى.

ەسىل اۋدانى پوليتسيا باسقارماسى باسشىسىنىڭ ورىنباسارى قىزمەتىنەن بوساتىلدى، ال اۋداندىق باسقارمانىڭ باسشىسىنا سوگىس جاريالاندى.

ەسكە سالايىق، سپورتشى بەيبىت شۇمەنوۆكە مەملەكەتارالىق ىزدەۋ جاريالاندى.

ول 18- ماۋسىمدا استاناداعى «Mega Silkway» ساۋدا ويىن-ساۋىق ورتالىعىندا قولىنا بالا ۇستاعان ەر ادامدى ۇرىپ-سوقتى دەپ ايىپتالدى.

ەلوردانىڭ پوليتسيا دەپارتامەنتى قىلمىستىق كودەكستىڭ 293-بابى (بۇزاقىلىق) بويىنشا سوتقا دەيىنگى تەرگەۋ امالدارىن جۇرگىزىپ جاتىر.

بوكسشى الەۋمەتتىك جەلىدەگى پاراقشاسى ارقىلى ءوز ارەكەتىن تۇسىندىرمەك تە بولدى.