مەكتەپكە سەبەپسىز بارمايتىن بالانى بايقاساڭىز، حابارلاۋ سۇرالادى - ءبىلىم باسقارماسى

«دالەلسىز سەبەپتەرمەن مەكتەپكە بارمايتىن بالالاردى انىقتاۋ ماقساتىندا ەلوردالىق پوليتسيا دەپارتامەنتىنىڭ ۋچاسكەلىك ينسپەكتورلارىمەن بىرلەسىپ، «ۇركەر»، «پريگورودنىي»، «تەلمان»، «زارەچنوە»، «جەلەزنودوروجنىي»، «كوكتال»، «ينتەرناتسيونالنىي»، «ميچۋرينو»، «پرومىشلەننىي»، «يۋگو-ۆوستوك» تۇرعىن ءۇي الاپتارىنا رەيدتەر جۇرگىزىلىپ جاتىر.
قۇرمەتتى قالا تۇرعىندارى، وزدەرىڭىز تۇراتىن ۇيدە، اۋلاڭىزدا، تانىستارىڭىزدىڭ اراسىندا كامەلەت جاسقا تولماعان مەكتەپكە بارمايتىن بالالاردى بايقاساڭىزدار، ءبىلىم باسقارماسىنا نەمەسە ۋچاسكەلىك پوليتسيا قىزمەتكەرلەرىنە حابارلاۋدى سۇرايمىز. ءبىزدىڭ جانە جالپى قوعامنىڭ ماقساتى - بارلىق بالانى ورتا بىلىممەن قامتاماسىز ەتۋ. سوندىقتان، وسى ىستە قولداۋلارىڭىزدى سۇرايمىز»، - دەدى قالالىق ءبىلىم باسقارماسىنىڭ باسشىسى قاسىمحان سەنعازىيەۆ استانا كوممۋنيكاتسيالار ورتالىعىندا.
بۇعان دەيىن قاسىمحان سەنعازىيەۆ «مەكتەپكە» جول اكسياسى اياسىندا 22 مىڭنان استام بالاعا كومەك كورسەتىلەتىنىن ايتقان ەدى. اتاپ ايتقاندا، استانادا جاعدايى تومەن وتباسى بالالارىنا 41 مىڭ تەڭگەدەن بەرىلەدى. بۇل كومەكتى الۋ ءۇشىن اتا-انالار مەكتەپكە جۇگىنۋى قاجەت.
سونداي-اق، بيىل جاڭا وقۋ جىلىندا استانادا 255 مىڭ بالا ءبىلىم الادى. ءبىرىنشى سىنىپقا 27 مىڭنان استام بالا بارادى دەپ كۇتىلىپ وتىر.