دارىگەرلەر قاراعاندىدا جاپپاي ۋلانعان بالالاردىڭ قازىرگى جاعدايى تۋرالى ايتتى

قاراعاندى. قازاقپارات - دارىگەرلەر قاراعاندى وبلىسىنىڭ بالالارعا ارناۋلى الەۋمەتتىك قىزمەت كورسەتۋ ورتالىعىندا ۋلانعان بالالاردىڭ جاعدايىنا تۇسىنىكتەمە بەردى.
None

وقيعا سالدارىنان ءبىر بالا كوز جۇمدى، التى بالا جان ساقتاۋ بولىمىندە جاتىر، دەپ حابارلايدى قازاقپارات ءتىلشىسى.

«قازىرگى ۋاقىتتا ءبىزدىڭ ورتالىقتا 9 بالا ەمدەلىپ جاتىر، 4 ناۋقاس رەانيماتسيا بولىمىندە جاتىر، ولاردىڭ بارلىعى اپپاراتتىق باسقارۋ ارقىلى تىنىس الۋدا، ياعني ينۆازيۆتى جەلدەتكىشتە. بالالاردىڭ جاعدايى وتە اۋىر، قازىرگى ۋاقىتتا ولار بارلىق قاجەتتى قارقىندى، ەتيوپاتوگەنەتيكالىق تەراپيانى الىپ جاتىر. ءبىز بارلىق بيولوگيالىق سۇيىقتىقتى زەرتتەۋگە الدىق، ياعني بارلىق ۆيرۋستار، بارلىق باكتەريالار جانە مۇمكىن باسقا ەكزوگەندىك زاتتار تەكسەرىلىپ جاتىر جانە ناتيجەلەر بويىنشا ءبىز ناقتى مالىمەت الامىز. سونىمەن قاتار، نەيروبوكسينگ بولىمىندە 5 پاتسيەنت بار: 10-15 جاس ارالىعىنداعى بالالار. بارلىعىنا ورتاشا اۋىرلىق دارەجە قويىلىپ وتىر، جاعدايلارى تۇراقتى، بالالاردىڭ قىزۋى جوق، ديسپەپسيالىق سيندروم جانە ديارەيا سيندرومى جوق، تولىق باقىلاۋدا. ولار سونداي- اق بارلىق ىقتيمال ينفەكتسيالىق اگەنتتەرگە تەكسەرىلەدى، ەكزوگەندىك اگەنتتەردىڭ ناتيجەلەرى الىنعاننان كەيىن ءبىز تولىق جاۋابىن بىلەمىز. ولار بارلىق قاجەتتى ەمدى الىپ جاتىر. سونىمەن قاتار، قاراعاندى قالالىق بالالار اۋرۋحاناسىندا ەكى ناۋقاس باقىلاۋدا. قازىرگى ۋاقىتتا ولار رەانيماتسيا بولىمىندە جاتىر، جاعدايلارى وتە اۋىر دەپ باعالانادى. ولار جاساندى- باسقارۋ ارقىلى تىنىس الۋدا. سونىمەن قاتار، بارلىق بالالار بەيىندى مامانداردان قاجەتتى كومەك پەن كەڭەس الدى»، - دەدى وبلىستىق كلينيكالىق اۋرۋحانانىڭ ينفەكتسيالىق ورتالىعىنىڭ باسشىسى ەرجان ءجۇنىسوۆ.

بۇدان بۇرىن حابارلانعانداي، قاراعاندى وبلىسىنىڭ بالالارعا ارناۋلى الەۋمەتتىك قىزمەت كورسەتۋ ورتالىعىندا بالالاردىڭ جاپپاي ۋلانۋ دەرەگى تىركەلدى.

وقيعا ورنىنا دەنساۋلىق ساقتاۋ ءمينيسترى اجار عينيات اتتاندى.

كەيىنىرەك دەنساۋلىق ساقتاۋ ۆيتسە-ءمينيسترى ايجان ەسماعامبەتوۆا ۇكىمەتتە تىلشىلەردىڭ ساۋالدارىنا جاۋاپ بەرە وتىرىپ، بالالاردىڭ نەدەن ۋلانعان ءالى انىقتالماعانىن حابارلادى.

پروكۋراتۋرا ورگاندارى وسى وقيعا بويىنشا تەرگەۋدى باستادى.

سوڭعى جاڭالىقتار