قازاقستانداعى دەمالىس ورىندارىنىڭ باعاسى قانشا؟

الەۋمەتتىك جەلىدە اقتوبەلىكتەر دەمالىس ورىندارىنىڭ قىمبات ەكەنىن ايتىپ، قىزۋ تالقىلاپ جاتىر.
«ادامدار نەگە تۇركيا مەن مىسىرعا بارىپ دەمالۋدى تاڭدايتىنىن ءتۇسىندىم. مىسىرعا بيلەتتى بىردەي باعامەن ساتىپ الۋعا بولادى جانە قيىندىقتار تۋمايدى. وزدەرى قارسى الادى، تاماقتارى سول باعانىڭ ىشىنە كىرەدى. ال بىزدە ءدال وسىنداي باعامەن نە ساتىپ الۋعا بولاتىنىن ويلاپ باسىڭدى قاتىراسىڭ»، - دەپ جازعان جەلى قولدانۋشىلارى.
بالقاش
بۇل قازاقستانداعى ەكىنشى ۇلكەن كول. تار تۇبەگى مەن ونىڭ ەتەگىنەن وتەتىن ۇزىن-ارال بۇعازى بالقاشتى ەكى بولىككە بولەدى. باتىس بولىگىندە تاياز، سۋى تۇشى، ال شىعىس بولىگى تۇزدى جانە تەرەڭ. قوناقۇيلەر مەن ساناتوريلەر دەمالۋشىلاردىڭ قىزمەتىندە. سۋ سپورتىمەن (جەلكەن، ەسكەك ەسۋ جانە كانوەدە ەسۋ) اينالىسۋعا، بالىق اۋلاۋعا مۇمكىندىك بار.
بالقاش كولىنىڭ كۋرورتتىق ايماعىنا بارماس بۇرىن الماتىعا جەتۋ كەرەك. اۋە بيلەتتەرى ەكى جاققا 115 مىڭ تەڭگە تۇرادى. سودان كەيىن لەپسى ستانتسياسىنا پويىزعا وتىرۋ قاجەت. ءبىر جاقتى پويىز بيلەتتەرىنىڭ باعاسى 4000 تەڭگەدەن باستالادى جانە كولگە تاكسي نەمەسە شاعىن اۆتوبۋسپەن عانا جەتە الاسىز.
بالقاشقا جەتۋدىڭ ەكىنشى جولى، استانا ارقىلى بارىپ، كەلۋ باعاسى 90 مىڭ تەڭگە. سودان كەيىن پويىزبەن لەپسى ستانتسياسىنا بارىپ، سول جەردەن پويىزعا مىنەسىز، بيلەتتەرىنىڭ باعاسى 6000 تەڭگەدەن باستالادى. ءارى قاراي بالقاش كولىنە تاكسي نەمەسە شاعىن اۆتوبۋسپەن باراسىز. دەمالىس ايماقتارىندا، پاتەرلەر مەن قوناقۇيلەردە ءبىر كۇننىڭ قۇنى 8-30 مىڭ تەڭگە ارالىعىندا.
نەگىزىندە، قوناقۇيلەردەگى تاماق اقىلى، ءبىراق ءارتۇرلى سايتتارداعى شولۋلارعا قاراعاندا، بۇل وتە قىمبات ەمەس، سوندىقتان تاماققا قوسىمشا 50 مىڭ تەڭگە جيناپ بارعانىڭىز دۇرىس بولادى. سۋ سپورتى سياقتى كوپتەگەن ويىن-ساۋىق تۇرلەرى اقىلى، سوندىقتان تاعى 20 مىڭ تەڭگە قوسىڭىز. سوڭىندا ءبىر ادامعا دەمالۋ الماتى ارقىلى 315 مىڭ تەڭگەگە، استانا ارقىلى 290 مىڭ تەڭگەگە تۇسەدى.
قاپشاعاي
قاپشاعاي - الماتى وبلىسىنىڭ تۇرعىندارى مەن بارشا قازاقستاندىقتاردىڭ تانىمال دەمالىس ورنى. سۋ قويماسىنىڭ جاعالاۋىندا جەكەمەنشىك دەمالىس ورىندارى بار. مۇندا جوعارى دەڭگەيلى قوناقۇيلەر، پانسيوناتتار، ۇلتتىق ناقىشتاعى دەمالىس ورتالىقتارى بار.
قاپشاعاي شيپاجايى الماتى وبلىسىندا ورنالاسقان، سوندىقتان الماتىعا جەتىپ الۋ كەرەك. اۋە بيلەتتەرى ەكى جاققا 115 مىڭ تەڭگە تۇرادى. الماتىدان كۋرورتتىق ورتالىققا دەيىن 75 شاقىرىم. الماتىدان پويىزعا بيلەت ساتىپ الۋعا، كادىمگى اۆتوبۋسقا نەمەسە تاكسيگە وتىرۋعا بولادى. قاپشاعايعا پويىزبەن جەتۋ ءۇشىن بيلەت ساتىپ الۋ كەرەك. بيلەت قۇنى پويىزدىڭ تۇرىنە، ۆاگونعا جانە قىزمەت كورسەتۋ كلاسىنا بايلانىستى 600 تەڭگەدەن 4 مىڭ تەڭگەگە دەيىن. قاپشاعايدا ءبىر اپتا تۇرۋ 90-300 مىڭ تەڭگە ارالىعىندا بولادى. قوناقۇيلەردىڭ كوپشىلىگىنىڭ بولمەلەرىندە اس ۇيلەرى بار، ءبىراق بارلىق تاعامدار بولمەنىڭ باعاسىنا كىرمەيدى. قاپشاعايدا ءبىر ادامنىڭ اپتالىق دەمالىسى ورتاشا ەسەپپەن 280 مىڭ تەڭگە بولادى.
مويىلدى كولى
پاۆلوداردان وڭتۇستىك- شىعىسقا قاراي 15 شاقىرىم جەردەگى تابيعي بالشىقتىڭ ەرەكشە ەمدىك قاسيەتتەرىمەن ايگىلى - مويىلدى كولى. بالشىقتىڭ مينەرالدى قۇرامى ءالى تولىق زەرتتەلمەگەن، ءبىراق ولار تەرى جانە بۋىن اۋرۋلارىن ەمدەۋدە پايدالى اسەرىن بەرەدى. مۇنداعى كۋرورتتىق ايماق سوناۋ 1922 -جىلى ۇيىمداستىرىلعان.
اقتوبەدەن پاۆلودارعا تىكەلەي رەيس بولماعاندىقتان، استانا ارقىلى ۇشۋعا تۋرا كەلەدى. ەلورداعا بيلەت 40 مىڭ تەڭگە تۇرادى. ءبىر قىزىعى، استانا- پاۆلودار رەيسىنىڭ بيلەتتەرىن 10 مىڭ تەڭگەدەن تابۋعا بولادى جانە ولاردىڭ سانى وتە كوپ. پاۆلوداردان شيپاجايعا دەيىنگى قاشىقتىق 17 شاقىرىم. شيپاجايعا №66-تۇراقتى اۆتوبۋس قاتىنايدى، جول ءجۇرۋ ۋاقىتى 1 ساعات، جول ءجۇرۋ اقىسى 80 تەڭگە. شيپاجايعا تاكسيمەن دە جەتۋگە بولادى. ياندەكس قوسىمشاسىندا باعاسى 2 مىڭ تەڭگەدەن باستالادى. شيپاجايدا تۇرۋ باعاسى كۇنىنە 9 مىڭ تەڭگەدەن باستاپ، ورتاشا العاندا، ءبىر اپتا تۇرۋ 65-120 مىڭ تەڭگە بولادى. جالپى، ەمدەۋ شيپاجايىنا بارۋ قوسىمشا شىعىندى ەسەپتەمەگەندە 180 مىڭ تەڭگە.