قالىڭ مالدى قايتارىپ الۋعا بولا ما؟

استانا. قازاقپارات - ەكى جاس باس قوسىپ، شاڭىراق كوتەرۋگە بەل بۋادى. ادەت-عۇرىپ بويىنشا بارلىق كادە جاسالىپ، قىزدىڭ قالىڭ مالى تولەنەدى.

ءبىراق ۋاقىت وتە ەكەۋارا جاراسپاي، اجىراسىپ جاتادى. وسى كەزدە تاراپتار داۋلاسىپ، بەرگەن قالىڭ مالىن قايتارۋدى تالاپ ەتىپ جاتاتىنى بار.

بۇل قانشالىقتى زاڭدى ەكەنىن زاڭگەر مامانى ايتتى، - دەپ حابارلايدى otyrar.kz سايتى.

زاڭگەر ۆەنەرا نۇرعالي قىزىنىڭ ايتۋىنشا، قازاقستان رەسپۋبليكاسى كونستيتۋتسياسىنىڭ 13-بابىنىڭ 2-تارماعىنا سايكەس، اركىمنىڭ ءوز قۇقىقتارى مەن بوستاندىقتارىنىڭ سوت ارقىلى قورعالۋىنا قۇقىعى بار. كەز كەلگەن ادام ءوزىنىڭ قۇقىعى شەكتەلدى دەپ ويلاسا، سوتقا جۇگىنە الادى.

ەگەر قۇدالار جاعىنان قاعاز نەمەسە اۋىزشا كەلىسىم بولماسا، قالىڭمال قايتارىلمايدى. ءىس سوتقا دەيىن بارسا، ول جەردە ناقتى دالەلدەر كورسەتىلۋى كەرەك. كوپ جاعدايدا سوت شەشىمى قاناعاتتاندىرۋسىز قالدىرىلىپ جاتادى. ويتكەنى بەرىلگەن قالىڭمال سىيلىق رەتىندە ەكىنشى جاققا تابىستالادى.

«دەگەنمەن قالىڭ مالدى سوت ارقىلى قايتارۋعا بولاتىن جولى بار. ول ءۇشىن قولحات بولۋى شارت. نەمەسە قاعاز جۇزىندە نەكە كەلىسىمشارتى تۇزىلسە، بەرىلگەن قالىڭ مالدى قايتارىپ الۋعا مۇمكىندىگىڭىز بار»، - دەدى ۆەنەرا نۇرعالي قىزى.