ازيا داۋىسى: الماتىدا اتى اڭىزعا اينالعان امەريكالىق توپ ونەر كورسەتتى

29-شىلدەدە شارانىڭ باستى حەدلاينەرى - Black Eyed Peas توبىنىڭ مەگا-جۇلدىزدارى كورەرمەن الدىندا ونەر كورسەتتى، دەپ حابارلايدى قازاقپارات ءتىلشىسى.
فەستيۆال تاريحىندا العاش رەت شاقىرىلعان الەم جۇلدىزدارىنىڭ تولىققاندى جەكە كونسەرتى ءوتتى.
Zakazbiletov.kz جوباسىنىڭ ديرەكتورى ءسابيت سۇلەيمەنوۆتىڭ ايتۋىنشا، Black Eyed Peas توبى قازىر ەۋروپاداعى گاسترولدە ءجۇر. ەگەر ولار امەريكادا بولعاندا الىپ كەلۋ قيىنعا سوعار ەدى. «ازيا داۋىسى» وتەتىن ۋاقىتتا ولار بوس بولعان.
«ولاردى الماتىعا ۆەنگريادان الىپ كەلدىك. بۇدان ءارى يسپانياعا ۇشىپ كەتەدى، ياعني ەۋروپالىق تۋرلارىنا قايتا ورالادى. تاڭداۋ نەلىكتەن ولارعا ءتۇستى؟ سەبەبى باسقالارىنا قاراعاندا ولار وسىندا كەلگىسى كەلدى جانە توپ مەندجمەنتى الماتىعا ساپاردى تالقىلاۋعا دايىن بولدى. كونسەرتتى «ازيا داۋىسى» شەڭبەرىندە وتكىزۋ شەشىلدى. سەبەبى وعان فەستيۆالدىڭ فورماتى مۇمكىندىك بەرىپ تۇردى: ءبىرىنشى كۇن - قازاقستاندىق، ەكىنشى - حالىقارالىق جانە ءۇشىنشى كۇن اڭىز انشىلەرگە ارنالعان. وسىلايشا، ءساتى بولىپ، حالىقارالىق كۇندى توپتىڭ الەمدىك تۋرنەسىمەن بىرىكتىرۋ مۇمكىن بولدى»، - دەيدى س. سۇلەيمەنوۆ.
ۇيىمداستىرۋشىلاردىڭ سوزىنشە، قازىرگى ۋاقىتتا Black Eyed Peas توبى «Where is the Love» حيتىنىڭ 20 جىلدىعى جانە وسى اتتاس توعىزىنشى البومنىڭ شىعۋىنا وراي Elevation الەمدىك تۋرنەسىن وتكىزۋدە. مۋزىكا اڭىزىنا اينالعان will.i.am وسى ءۇشىن توپقا قايتا قوسىلعان. ال ءانشى فەرگيدىڭ ورنىن J. Rey Soul ءساتتى الماستىرىپ كەتكەن.
Black Eyed Peas - ادامزات تاريحىندا البومى ەڭ كوپ ساتىلعان توپتاردىڭ ءبىرى. اتى اڭىزعا اينالعان امەريكالىق حيپ-حوپ توبى.
كەشەگى كونسەرتتە كىشىگىرىم وقيعا بولدى - داعىستاننان كەلگەن توپتىڭ جانكۇيەرى «I Gotta Feeling دى ورىنداعىم كەلەدى» دەگەن جازۋى بار پلاكات ۇستاپ تۇردى. ونى كورگەن مۋزىكانتتار جىگىتتى ساحناعا شاقىرىپ الىپ، ونىمەن بىرگە ءاننىڭ ءبىر بولىگىن ورىندادى. داعىستاندىق قوناقتىڭ قۋانىشىندا شەك بولمادى. ستاديونعا جينالعاندار باقىتتى ادام مەن will.i.am-عا قوشەمەت كورسەتىپ، قول سوقتى.
«قازىردىڭ وزىندە جاندانعان «ازيا داۋىسى» ءتۋريزمنىڭ دامۋىنا اسەر ەتە باستادى. سەبەبى قازاقستاننىڭ ءار قالالارىنان جانە رەسەي، بىرىككەن اراب امىرلىكتەرى سياقتى بىرنەشە ەلدەن جانكۇيەرلەر الماتىعا تەك Black Eyed Peas ءۇشىن كەلدى. الماتى بۇرىن- سوڭدى مۇنداي كەرەمەت شوۋدى كورگەن ەمەس: Black Eyed Peas 2000-شى جىلدارداعى حيتتەرىن ورىنداعان كەزدە كورەرمەندەر تۇگەل بيلەدى»، - دەپ اتاپ ءوتتى ۇيىمداستىرۋشىلار.
فەستيۆالدىڭ ەكىنشى كۇنى اسەرلى اياقتالدى. «حارەكەت» قوعامدىق قورى «ازيا داۋىسى» ساحناسىندا قازاقستاندىقتاردىڭ اقشاسىنا ساتىپ الىنعان پاتەردىڭ كىلتىن مۇقتاج وتباسىنا تابىس ەتتى.
بۇگىن، فەستيۆالدىڭ سوڭعى كۇنى كورەرمەندەر اڭىزعا اينالعان رەترو جۇلدىزداردى كورەدى. Secret Service جانە ياللا توپتارى، قازاقستاندىق ەسترادا جۇلدىزدارى 40 مينۋت ونەر كورسەتەدى جانە سالتاناتتى وتشاشۋ بولادى.
فەستيۆالدىڭ ءبىرىنشى كۇنىندە «جاس قانات 2023» جاس ورىنداۋشىلار بايقاۋىنىڭ جەڭىمپازدارى ونەر كورسەتكەن بولاتىن. سونداي-اق بايعالي سەركەبايەۆتىڭ «دجۋليا» ميۋزيكلىنەن ءۇزىندىنىڭ تۇساۋكەسەرى كەزىندە «A-studio» توبىنىڭ اندەرى شىرقالىپ، كورەرمەن الەمدىك حيتتەردى ەسكە الدى.
ايتا كەتەيىك، الماتى قالاسىنىڭ اكىمدىگى كورەرمەندەردىڭ «مەدەۋگە» ەش قيىندىقسىز جەتىپ، قالاعا ورالۋىن قامتاماسىز ەتتى. فەستيۆال كۇندەرى قوسىمشا تەگىن اۆتوبۋستار قاتىنايدى. ولار ساتبايەۆ پەن بايتۇرسىنوۆ قيىلىسىنان ساعات 14:00-دەن 24:00-گە دەيىن 10-15 مينۋت ارالىقپەن جۇرەدى.