21:11, 28 - شىلدە 2023 | GMT +5
تۇركيا مەن يتاليا فۋتبولدان ەۋروپا چەمپيوناتىن بىرلەسىپ وتكىزۋگە ءوتىنىش بەردى
استانا. قازاقپارات - ەۋروپالىق فۋتبول قاۋىمداستىقتارى وداعى (UEFA) تۇركيا مەن يتاليا فۋتبول فەدەراتسيالارى 2032-جىلعى ەۋروپا چەمپيوناتىن بىرلەسىپ وتكىزۋ جايلى ءوتىنىش بەرگەنىن حابارلادى.
بىرلەسىپ وتكىزۋ جايلى ەكى ەل فەدەراتسياسى دا راستاعان. بۇعان دەيىن تۇرىكتەر 2028 نەمەسە 2032-جىلعى جارىستى وتكىزۋگە تالاساتىنىن ايتقان ەدى. يتاليا فۋتبول فەدەراتسياسى 2032-جىلعى ەۋرونى وتكىزۋگە مۇددەلى بولعان.
2028-جىلعى ەۋروپا چەمپيوناتىن انگليا، سولتۇستىك يرلانديا، يرلانديا، شوتلانديا جانە ۋەلس بىرگە ۇيىمداستىرعىسى كەلەدى. ءوتىنىش بەرىپ تە ۇلگەرگەن.
UEFA يتاليا جانە تۇركيا ۇسىنعان ءوتىنىشتى قاراستىرادى، قۇجاتتارى مەن جارىس تالاپتارىنا ساي بولۋىن قاداعالايدى. ەگەر بىرلەسكەن ۇسىنىس قۇجاتتارى تالاپتارعا ساي بولسا، وندا ۇيىمنىڭ اتقارۋشى كوميتەتىنە جولدانادى. ناتيجەسىندە 10- قازان كۇنى 2028 جانە 2032-جىلعى ەۋرودودانى وتكىزەتىن ەلدەر بەلگىلى بولادى.
