گرەكياداعى ورمان ءورتى وق-ءدارى قويماسىنا جەتتى

گرەكياداعى ەگەي تەڭىزى جاعالاۋىنداعى ورتكە ورانعان ВВС ۆولوس بازاسى اۋدانىندا كۇشتى جارىلىستىڭ داۋىسى ەستىلدى. تابيعي ءورت مۇنداعى وق-ءدارى قويمالارىن جويدى، دەپ حابارلايدى قازاقپارات euronews-كە سىلتەمە جاساپ.
قىزمەتكەرلەر مەن F-16 ۇشاقتارى الدىن الا باسقا بازاعا كوشىرىلدى. ءورت كۇزەتى 12 ەلدى مەكەن ەۆاكۋاتسيالانعانىن حابارلادى. رەسمي دەرەكتەر بويىنشا، وق-ءدارىنىڭ جارىلۋىنان ەشكىم قاتتى زارداپ شەككەن جوق.
ۆولوس قالاسى ماڭىنداعى ءورت - گرەكيانىڭ جەدەل قىزمەتتەرى كۇرەسىپ جاتقان 124 تابيعي ءورتتىڭ ىشىندەگى ەڭ قاۋىپتىسى. تۋريزمگە تاۋەلدى ايماقتار دا زارداپ شەگىپ وتىر: كەلۋشىلەردى ەۆاكۋاتسيالاۋ جەرگىلىكتى كاسىپكە زالال كەلتىرىپ جاتىر.
«قارجىلىق تۇرعىدا كيوتاتي اۋدانىنداعى بىردە-ءبىر وتباسى قىستان قينالماي وتە المايدى. سەبەبى ءبارى جابىق. قالاي اشىلاسىز؟ كىم ءۇشىن جۇمىس ىستەيسىز؟ جەرگىلىكتى تۇرعىندار ءۇشىن بە؟ ولار ءار كەشتە كەشكى اس ىشۋگە بارمايدى. ەشكىم كۇن سايىن تاماقتانۋ ءۇشىن سىرتقا شىقپايدى. ۇنەمدەۋگە تۋرا كەلەدى. ءبىز جاز بويى تىنىمسىز ەڭبەك ەتەمىز. جۇمىس وتە قيىن، كۇنىنە 14 ساعات، ءتىپتى ودان دا كوپ جۇمىس ىستەيمىز»، - دەدى La Strada مەيرامحاناسىنىڭ يەسى ەلەنا حريسافيناس.
ۇكىمەت گرەكيا كۋرورتتارىنىڭ باسىم بولىگى تۋريستەر ءۇشىن قاۋىپسىز ەكەنىن ايتتى. ەلدەگى جاعداي ون كۇننەن بەرى وتە قيىن. ءبىر عانا رودوستاعى اپات ورنىنان ون مىڭداعان ادام ەۆاكۋاتسيالاندى.