دجەكي چان دومبىراعا قوسىلىپ قىتايشا ءان ايتتى

استانا. قازاقپارات - الەمگە تانىمال اكتەر، كاسكاديەر، كينورەجيسسەر دجەكي چان قىتايدىڭ «ناعىز قاھارماندار» اتتى ءانىن شىڭجاڭنىڭ كورىكتى جايلاۋىندا دومبىراعا قوسىلىپ شىرقادى، دەپ حابارلايدى قازاقپارات ءتىلشىسى.

«بۇل ءاندى ءارتۇرلى كونسەرتتەردە تىڭداپ جۇرگەن شىعارسىزدار. ءبىراق دومبىرانىڭ سۇيەمەلدەۋىمەن ەشكىم ەستىمەگەن بولۋى كەرەك. بۇگىن مەن سىزدەرگە «ناعىز قاھارمانداردى» دومبىرامەن ايتىپ بەرەيىن»، - دەيدى دجەكي چان.

بۇل بەينەجازبا قاي جەردە، قاشان تۇسىرىلگەنى بەلگىسىز. دەگەنمەن، جاقىندا عانا دجەكي چان قىتاي مەملەكەتى «تۇلپار مەكەنى» دەپ تانىعان ىلە قازاق اۆتونوميالى وبلىسىنىڭ موڭعولكۇرە اۋدانىندا وتكەن «تۇلپار» حالىقارالىق تۋريزم مەرەكەسىنە كەلىپ، سوندا ونەر كورسەتكەن بولاتىن. قىتايلىق اكتەردىڭ دومبىرامەن ايتقان بۇل ءانى وسى تۋريستىك فەستيۆالعا كەلگەن كەزدە ورىندالعان بولۋى مۇمكىن.

ايتا كەتەيىك، 16- شىلدەدە 2023 -جىلعى «تۇلپار مەكەنى» حالىقارالىق تۋريستىك فەستيۆالى شىڭجاڭنىڭ ىلە قازاق اۆتونوميالى وبلىسى موڭعولكۇرە اۋدانىنىڭ «تۇلپار مەكەنى» مادەني تۋريستىك ساياباعىندا اشىلعان بولاتىن. بيىلعى فەستيۆالدىڭ اشىلۋ سالتاناتىنا دجەكي چان، چجان ييسين، گۋلي ناجا سىندى قىتايلىق اكتەرلەر قاتىستى. دجەكي چان 56 ەتنوس وكىلدەرىمەن بىرگە «ۇلت» ءانىن ورىنداسا، كورەرمەندەرمەن بىرگە «تۋعان جەردى جىرلايمىز» ءانىن شىرقاعان ەدى.

اۆتور:

بەيسەن سۇلتان