تۋريستەردىڭ ەڭ ءجيى جىبەرەتىن قاتەلىكتەرى قانداي

وسى جانە وزگە دە سۇراقتارعا ت ج م رەسپۋبليكالىق جەدەل- قۇتقارۋ جاساعىنىڭ قۇتقارۋشىلارى جاۋاپ بەردى، دەپ حابارلايدى قازاقپارات.
رەسپۋبليكالىق جەدەل- قۇتقارۋ جاساعىنىڭ باس قۇتقارۋشىسى ۆاديم پاكتىڭ ايتۋىنشا، جاياۋ سەرۋەندەۋ كەزىندە قاۋىپسىزدىكتى قامتاماسىز ەتۋ ءۇشىن، ەڭ الدىمەن ءجۇرۋ باعىتىن جوسپارلاپ، ول تۋرالى تانىستارىڭىز بەن جاقىندارىڭىزعا ايتىپ، حاباردار ەتۋ كەرەك.
«تاۋعا شىعۋدى جوسپارلاماس بۇرىن، ءجۇرۋ باعىتىن انىقتاپ، توپتىڭ سانىن ەسەپتەۋ كەرەك، الداعى ساپاردىڭ بارلىق ەرەكشەلىكتەرىن تولىق ءبىلۋ كەرەك: شىعاتىن ۋاقىت، قايتاتىن ۋاقىت، مارشرۋتتىڭ كۇردەلىلىگى جانە ت. ب. بۇل جەردە ءجيى كەزدەسەتىن قاتەلىك - جاقىندار مەن تانىستارعا ەسكەرتپەستەن، ۇندەمەي كەتۋ. اپات بولعان جاعدايدا زارداپ شەگۋشىنى تەزىرەك تابۋ ءۇشىن مارشرۋتتى، تۇراقتاعان ورىنداردى انىقتاۋعا كوپ ۋاقىت كەتەدى»، - دەدى ول وڭىرلىك كوممۋنيكاتسيالار قىزمەتىندە وتكەن بريفينگىندە.
ودان كەيىنگى ەڭ ماڭىزدى جايت - قاجەتتى جابدىقتى دايىنداۋ. قۇتقارۋشىلاردىڭ ۇسىنىسى بويىنشا، ءار تۋريستىڭ ريۋكزاگىندا توتەنشە جاعدايلارعا ارنالعان العاشقى كومەك قوبديشاسى، قوسالقى باتارەيالارى بار شامدار مەن باسقا دا جارىقتاندىرعىشتار، قۋاتتاعىش قۇرالدار، سۋ جانە جەڭىل تاعامدار بولۋى كەرەك. تاۋلارداعى قۇبىلمالى كۇن رايىن ەسكەرە وتىرىپ، اۋىستىرۋعا بولاتىن جىلى كيىم دە ارتىق بولمايدى.
«تاۋدا اۋا تەمپەراتۋراسى قالاعا قاراعاندا الدەقايدا تومەن. تاۋعا شىعاتىنداردىڭ جىبەرەتىن قاتەلىگى - ولار وزدەرىمەن بىرگە جىلى، اۋىستىرۋعا بولاتىن كيىمدەردى المايتىندىعىندا. ويتكەنى، تاۋعا شىققاندا ادام قاتتى تەرلەيدى، سودان كەيىن ول جەل ءتيىپ، سۋىق ءتيۋى مۇمكىن»، - دەپ اتاپ ءوتتى سپيكەر.
ەگەر تۋريست توتەنشە جاعدايعا تاپ بولسا، قۇتقارۋشىلاردى شاقىرۋ ءۇشىن 112 نومىرىنە قوڭىراۋ شالۋ كەرەك. بايلانىس بولماعان جاعدايدا، تۋريستەر وسى ماقساتتار ءۇشىن سالىنعان لاشىقتاردى پانالاپ، قۇتقارۋشىلارلى كۇتە الادى. قۇتقارۋ لاشىقتارى تاۋلى مارشرۋتتاردىڭ ءجيى باراتىن ۋچاسكەلەرىندە ورناتىلعان.
«ەگەر تاۋدا بايلانىس بولماسا، قازىر الماتى قالاسىنىڭ ت ج د- مەن بىرلەسىپ، تۋريست نەمەسە تۋريستەر توبى سۋىقتان، قولايسىز كۇن رايىنان ءبىراز ۋاقىت پانالاي الاتىن قۇتقارۋ لاشىقتارى سالىنعان. دەمەك، كومەك كۇتە الادى نەمەسە قاراڭعى ۋاقىتتا سول جەرگە تۇنەي الادى. ءارى قاراي، ەگەر كۇن شىقسا، مارشرۋت بويىنشا ۇيگە قاراي جۇرگەن دۇرىس. ەگەر اداسىپ قالسا، وندا سول ورىندا قالۋ كەرەك. ەگەر بايلانىس بولسا، قۇتقارۋشىلاردى قايتادان شاقىرۋ كەرەك نەمەسە ادەتتە جاقىن ماڭداعى تۇنەگەن لاشىقتاردا اقپاراتتىق تىرەكتەردەگى تەلەفون نومىرلەرىن پايدالانۋ كەرەك»، - دەپ اتاپ ءوتتى ۆ. پاك.