الماتى تاۋلارىندا سەل ءجۇرۋ قاۋپى بار – ت ج د ەسكەرتۋ جاريالادى

الماتى. قازاقپارات - الماتى تاۋلارىندا سەل قاۋپى جوعارى دەپ جاريالاندى. وسىعان بايلانىستى توتەنشە جاعدايلار دەپارتامەنتى تۇرعىندارعا تاۋعا شىقپاۋعا كەڭەس بەردى، دەپ حابارلايدى قازاقپارات ءتىلشىسى.
None

«قازگيدرومەت» تاراتقان ەسكەرتۋ نەگىزىندە الماتىنىڭ توتەنشە جاعدايلار قىزمەتى تۇرعىندارعا تاۋعا شىقپاۋعا كەڭەس بەرەدى. 28-شىلدە كۇنى تاۋلى ايماقتاردا جانە قالادا نوسەر جاڭبىر جاۋىپ، نايزاعاي وينايدى، بۇرشاق پەن داۋىل تۇرادى دەپ كۇتىلەدى.

«سوڭعى 13 كۇندە قالىپتاسقان اۋا تەمپەراتۋراسىنىڭ جوعارىلاۋىنا بايلانىستى، الماتى تاۋلارىندا گلياتسيالدى (مۇزدىق) جانە نوسەرلى سيپاتتاعى سەل قاۋپىنىڭ جوعارى دارەجەسى بايقالادى. گيدرومەتەورولوگيالىق جانە سەل جاعدايىنىڭ تالداۋىنا سايكەس، قاتتى جاڭبىر جاۋعان كەزدە سەل ءجۇرۋى مۇمكىن»، - دەلىنگەن رەسمي حابارلامادا.

وسىعان بايلانىستى الماتىدا ورنالاسقان قۇتقارۋ بولىمشەلەرى، قالالىق ازاماتتىق قورعاۋ قىزمەتتەرى، اۋداندىق اكىمدىكتەر، ازاماتتىق قورعاۋ قىزمەتتەرىنىڭ اۆاريالىق- قۇتقارۋ، ينجەنەرلىك تەحنيكاسى جوعارى دايىندىق رەجيمىنە كەلتىرىلدى.

ال قازسەلدەنقورعاۋ بولىمشەلەرى سەل قاۋپى بار ۋچاسكەلەردە باقىلاۋدىڭ جەدەلدەتىلگەن رەجيمىنە اۋىستىرىلىپ، اەروۆيزۋالدى جانە جەرگىلىكتى باقىلاۋ جۇرگىزىلۋدە، ينجەنەرلىك- تەحنيكالىق قىزمەتكەرلەردىڭ تاۋلىك بويى كەزەكشىلىگى ۇيىمداستىرىلدى.

«قۇرمەتتى تۋريستەر، الماتى قالاسىنىڭ تۇرعىندارى مەن قوناقتارى. سەل تاسقىنىنا قالىپ قالعان جاعدايدا، قۇتقارىلۋعا مۇمكىندىك جوق. سەل تاسقىنى قاۋپىنە بايلانىستى ىلە الاتاۋ تاۋلارىنا بارماۋدى سۇرايمىز»، - دەپ ەسكەرتتى دەپارتامەنت وكىلدەرى.

سەل قاۋپى بار جەرلەردە نە ىستەۋ كەرەك:

- تاۋداعى جاعداي تۋرالى ب ا ق حابارلارىن ۇنەمى قاداعالاپ وتىرۋ؛

- ەگەر قاۋىپ تونسە نەمەسە كەنەتتەن سەل جۇرسە، رەلەفتىڭ ەڭ بيىك نۇكتەسىنە كوتەرىلۋ؛

- سەل قاۋپى بار كانالداردىڭ جانىندا، كول كوپىرلەرىندە (بوگەتتەردە) جانە ولاردىڭ استىندا شاتىر تىكپەۋ، دەمالۋعا ايالداماۋ.

سوڭعى جاڭالىقتار