ب ق و پوليسيا دەپارتامەنتىندە «كيبەرپول» توبى جۇمىسقا كىرىستى

ب ق و پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەنىندەي، جاڭا قۇرىلىمنىڭ الدىندا تۇرعان باستى مىندەت - ينتەرنەت الاياقتىققا قارسى كۇرەستى كۇشەيتىپ، قىلمىستىڭ الدىن الۋ.
جاڭا ءبولىنىستىڭ اشىلۋ راسىمىنە ب ق و پ د باستىعى، پوليتسيا پولكوۆنيگى ارمان ورازاليەۆ، وبلىس پروكۋرورىنىڭ ورىنباسارى ازامات ساتبايەۆ قاتىستى.
«كيبەرپول» پيلوتتىق جوباسىن ىسكە اسىرۋ ءۇشىن ءبىز بيىل 19- مامىردان باستاپ جۇمىس جۇرگىزىپ كەلەمىز. بۇل قىلمىستى اشۋ جانە تەرگەۋدى ءبىر مامانداندىرىلعان توپ ىسكە اسىراتىن بولادى. توپتىڭ قۇرامىندا 9 قىزمەتكەر (4 تەرگەۋشى، 4 جەدەل ۋاكىل، 1 كريميناليست) بار، ولار زاماناۋي تەحنيكامەن جاراقتالدى. قىزمەتكەرلەر «ءبىر تەرەزە» قاعيداتى بويىنشا جۇمىس ىستەپ، ارىز- شاعىم كەلىپ تۇسكەننەن كەيىن بىردەن بارلىق كەزەك كۇتتىرمەيتىن تەرگەۋ جانە جەدەل ىزدەستىرۋ ءىس- شارالارىن ءبىر ۋاقىتتا جۇرگىزەتىن بولادى»، - دەدى ا. ورازاليەۆ.
«كيبەرپول» ارنايى ءبولىنىسى سيفرلىق لابوراتوريامەن جابدىقتالعان. بولىنىستەگى ماماندار گادجەتتەردى باقىلاۋ ارقىلى ينتەرنەت- الاياقتار قولداناتىن باعدارلامالاردى دا انىقتاي الادى.
قازىرگى ۋاقىتتا اتالعان ءبولىنىستىڭ جەتكەن جەتىستىكتەرى دە جوق ەمەس. «كيبەرپول» توبى جۇمىس ىستەگەننەن بەرى 15 قىلمىس اشىلىپ، سوتقا جولداندى، ال 33 ءىس بويىنشا سوتقا دەيىنگى تەرگەۋ امالدارى جۇرگىزىلىپ جاتىر.
ەسكە سالا كەتەيىك، بۇدان بۇرىن ب ق و- دا قوعامدىق كومەكشىلەردىڭ جاردەمىمەن 56 قىلمىس اشىلعانىن جازعان بولاتىنبىز.