شەرحان مۇرتازانىڭ جالعىز ۇلى قايتىس بولدى

قارالى حاباردى جۋرناليست بانۋ داۋلەتبايەۆا ەستىرتتى.
«شەرحان مۇرتازانىڭ ۇلى قايتىس بولدى دەگەن حابار جەتتى. جالعىز ۇلى ەدى. تۇلپاردىڭ سوڭعى تۇياعى...»، - دەپ جازدى ول Facebook-تەگى پاراقشاسىندا.
قازاقستان جازۋشىلار وداعى اقپاراتتى راستادى.
«قازاقستاننىڭ حالىق جازۋشىسى شەرحان مۇرتازانىڭ جالعىز تۇياعى باقىتجان شەرحان ۇلى دۇنيەدەن وزعانى جونىندە قارالى حاباردى جەتكىزەمىز. جانازاسى سامال-1 شاعىن اۋدانى، 16№ ءۇي، 7-پاتەر، 2023-جىلعى 28- شىلدە كۇنى ساعات 10:00 دە شىعارىلادى»، - دەدى وداقتىڭ وكىلى.
جەرلەۋ ءراسىمى الماتىداعى «كەڭساي-2» زيراتىندا وتەدى.
ايتا كەتەيىك، قازاقستاننىڭ حالىق جازۋشىسى شەرحان مۇرتازانىڭ ءبىر ۇل، ءبىر قىزى بار. ۇلى - باتىلجان شەرحان ۇلى، قىزى - الما شەرحان قىزى.
«اعام باتىلجان شەرحان ۇلى جۋرناليستيكا فاكۋلتەتىن قىزىل ديپلوممەن تامامداعان. باسپادا جۇمىس ىستەپ، باقىتجان مومىش ۇلى ەكەۋى اكەمنىڭ «قىزىل جەبەسىن» اۋداردى. كەيىننەن اعام جەكە كاسىپپەن اينالىسىپ كەتتى. اكەم بىزگە ءوز شىعارمالارىن وقۋعا ۇگىتتەمەيتىن.
اكەم جۇمىس بولمەسىندە جازۋ جازىپ وتىرعاندا ۇيگە قوناق كەلىپ قالسا، انامىز «تىنىش، جاي جۇرىڭىزدەر، اقىرىن سويلەڭىزدەر» دەپ جۇرەتىن. وندايدا اكەم «ەمىن-ەركىن وتىرا بەرىڭىزدەر» دەپ جىميۋشى ەدى. بارلىق اقىن-جازۋشىلار سياقتى ءۇي شارۋاسىنا يكەمسىز بولدى. ءبىراق بالا تاربيەسىنە قاتتى كوڭىل بولەتىن. اعامدى سپورتقا بەردى. ونى حوككەيگە ءوزى اپارىپ، ءوزى الىپ كەلەتىن»، - دەپ جازعان الما شەرحان قىزى ەستەلىكتەرىندە.