قوعامنىڭ قارسىلىعىنا قاراماستان كوكپار تارتقان باتىر قىز جايلى دەرەكتى فيلم جارىق كوردى

بۇل - بالا كەزىنەن دالا توسىندە ويقاستاپ، كوكپار مادەنيەتىن بويىنا ءسىڭىرىپ وسكەن تاباندى قىزدىڭ سۇيىكتى ىسىمەن اينالىسۋ جولىنداعى كۇرەسى جايلى وقيعا، دەپ حابارلايدى قازاقپارات.
ءداستۇرلى قاساڭ قوعامدا ايەلدەرگە كوكپار تارتۋعا قاتاڭ تىيىم سالىنعان.
ءبىراق ەۆا قيىندىقتارعا مويىماستان تاباندىلىق تانىتىپ، ستەرەوتيپتەردى بۇزدى، الەۋمەتتىك جانە مادەني توسقاۋىلداردى ەڭسەرە ءبىلدى.
ول كوكپار تەك ەرلەردىڭ ويىنى دەگەن مىقتىلارمەن تەكەتىرەستە بولدى. دەگەنمەن ەۆانى قولدايتىندار دا تابىلىپ، ونىڭ جىگەرىنە، ارمانىنا ادال مىنەزىنە لايىقتى باعاسىن بەرە الدى.
ولار ەۆانى جىگەرلەندىرىپ، توسقاۋىلدارعا توتەپ بەرۋىنە كومەگىن ايامادى. ەۆا كادىمگى قارا كۇشتەن دە، يكەمنەن دە كەندە ەمەس؛ ال ونىڭ ىشكى جىگەرى، جالىنى مەن تاباندىلىعى - كورگەن ادامدى قاناتتاندىرادى.
فيلم كورەرمەندى ەموتسيالىق ساياحاتقا ءۇيىرىپ اكەتىپ، سول ۋاقىتتا - كەيىپكەردىڭ الدىنداعى قيىندىقتاردى، ونىڭ سايگۇلىككە دەگەن ماحابباتىن پاش ەتەدى.
«اتا-انام كوكپارعا قاتىسۋعا تىيىم سالعان. ءبىراق ءبىر جەردە كوكپار بولىپ جاتىر دەسە دەلەبەم قوزىپ، ۇيدەن قاشىپ كەتەتىنمىن. كوكپارعا العاش رەت 15 جاسىمدا قاتىستىم. شاقىرۋسىز بارعان ەدىم. ءوزىم دە تاڭ قالدىم. اتتا وتىرىپ، ەرلەردىڭ كوكپاردا جان الىپ، جان بەرىسىپ جاتقانىن كوردىم. ولارعا قوسىلا كەتىپ، سەركەنى تارتىپ الىپپىن. ەرلەر مەنى قۋا جونەلدى، ءبىراق ۇستاتپاي كەتتىم. قازىر جۇرتتىڭ كوكپارعا قىزىعۋى ارتقانىن كورىپ ءجۇرمىن. ماعان ۇلدار دا، قىزدار دا حات جازىپ، ۇيرەتشى دەپ جاتادى»، - دەيدى ەۆا جيگالينا.
«ەۆا. باتىر قىز» دەرەكتى دراماسى - تەمىربەك امانجولدىڭ رەجيسسەرلىك العاشقى قادامى.
تەمىربەكتىڭ ءوزى دە ات تۋريزمىن جانە اتقا وتىرۋ مادەنيەتىن زەرتتەپ ءجۇر. ەۆانىڭ حيكاياسى - سالت-ءداستۇر، جىگەر مەن قۇرباندىق شيەلەنىسكەن الەمگە شىتىرمان ساياحات.
وسىنداي قىم-قۋىت الەمدە نازىك جان اعىسقا قارسى ءجۇزىپ، ماحاببات پەن جالىننىڭ المايتىن قامالى جوعىن ايشىقتايدى دەيدى ول.
«12 جىلدان بەرى اتتاردى فيلمدەرگە ءتۇسىرىپ، اتقا وتىرۋ مادەنيەتىن، نەونوماديزمدى زەرتتەپ ءجۇرمىن. «ەۆا. باتىر قىز» فيلمىندە قازاقىلىقتىڭ فورمۋلاسىن پاش ەتكىم كەلەدى. ەلى بوتەن، ءدىنى بوتەن باسقا جۇرتتار نەلىكتەن وسى ويىنعا عاشىق بولىپ، بار ءومىرىن سارپ ەتكىزۋگە بار؟ كوكپار مەن ات نەسىمەن تارتادى؟ ەڭبەكتى وسى سۇراقتارعا جاۋاپ ىزدەيتىن زەرتتەۋ دەسەڭىز دە بولادى»، - دەيدى تەمىربەك امانجول.
فيلمنىڭ پروديۋسەرى دۋمان قوجاحمەتتىڭ ايتۋىنشا، وسى فيلمنىڭ حالىقارالىق دەڭگەيگە شىعۋعا الەۋەتى مول.
قازىر بىرنەشە شەتەلدىك ستريمينگ-سەرۆيستەرمەن پروكات تۋرالى كەلىسسوزدەر ءجۇرىپ جاتىر دەيدى ول.
دەرەكتى فيلم ق ر مادەنيەت جانە سپورت مينيسترلىگىنىڭ تاپسىرىسىمەن ۇلتتىق كينونى قولداۋ مەملەكەتتىك ورتالىعىنىڭ قولداۋىمەن ءتۇسىرىلدى.