18:32, 26 - شىلدە 2023 | GMT +5
قىتايدا پارا العان جوعارى لاۋازىمدى شەنەۋنىك ءولىم جازاسىنا كەسىلدى
استانا. قازاقپارات - حاڭجوۋ قالاسىندا قىتاي كوممۋنيستىك پارتياسىنىڭ جوعارى لاۋازىمدى قىزمەتكەرى جوۋ جيانيەن 182 ميلليون يۋان (25 ميلليون دوللار) پارا الدى دەگەن ايىپپەن ءولىم جازاسىنا كەسىلدى، - دەپ حابارلايدى astanatv تەلەارناسى.

South China Morning Post اقپارات اگەنتتىگىنىڭ مالىمەتىنشە، جەمقور شەنەۋنىك جەر ماسەلەسىن شەشۋ ءۇشىن ۇيىمدار مەن جەكە تۇلعالاردان اقشا العان.
قازىرگى ۋاقىتتا قىتايدا ءولىم جازاسى كوپ جاعدايدا جۇرەك سوعىسىن توقتاتاتىن ينەكسيا ارقىلى جۇزەگە اسىرىلادى، بۇعان دەيىن تەك اتۋ جازاسى قولدانىلىپ كەلگەن. بۇگىندە اتۋ جازاسى ءولىم جازاسىنا كەسىلگەن قىلمىسكەرلەردىڭ بەلگىلى ءبىر ساناتى - تەك كىسى ولتىرگەندەر مەن ەسىرتكى ساتۋشىلار ءۇشىن عانا قولدانىلادى.
الايدا جەرگىلىكتى اقپارات قۇرالدارى 56 جاستاعى پارتيا قىزمەتكەرى ءۇشىن ءولىم جازاسىن ءومىر بويىنا باس بوستاندىعىنان ايىرۋ جازاسىنا اۋىستىرۋى مۇمكىن دەپ جازادى. بۇل جاعدايدا ول ءومىر بويىنا ساياسي قۇقىقتارىنان ايىرىلىپ، مۇلكى تاركىلەنەدى.