جەتىسايدا جاس كەلىننىڭ قولحات جازۋى كوپشىلىكتىڭ تاڭدانىسىن تۋدىردى
الەۋمەتتىك جەلىدە جاس كەلىننىڭ قولحات جازىپ وتىرعان ۆيدەوسى تارادى. وندا ورامال تاققان قىز ءوز ەركىمەن كەلىن بولىپ كەلگەنىن جازادى. سونداي-اق ەشكىم ماجبۇرلەمەگەنىن، كۇيەۋ جىگىتتىڭ ۇيىنە ءوز ەركىمەن كەلگەنىن، ەشكىمگە شاعىمى جوق ەكەنىن قاعازعا تۇسىرەدى. ۆيدەودان قولحات جازۋعا ۇيدەگى ۇلكەندەر جاعى كومەكتەسكەنى انىق كورىنىپ تۇر. ءتىپتى، جاسى ۇلكەن ايەلدەر جازاتىن ءاربىر ءسوزدى رەت رەتىمەن ايتىپ وتىر.
اتالعان وقيعا جەتىساي اۋدانىندا بولعان. كوپشىلىك وقىرمانداردىڭ سوزىنشە، جاس قىزدى سول ءۇيدىڭ بالاسى كەلىن ەتىپ الىپ قاشىپ كەلگەن.
«اتالعان بەينەجازباداعى جايت بويىنشا جەتىساي اۋدانىنىڭ پوليتسەيلەرى بىردەن تەكسەرۋ جۇمىستارىن جۇرگىزدى. ناتيجەسىندە اسىق اتا كەنتىنىڭ 24 جاستاعى تۇرعىنىنا 20 جاستاعى قىزدىڭ ءوز ەركىمەن تۇرمىسقا شىققانى انىقتالدى. جاس قىزبەن سۇحباتتاسۋ بارىسىندا، ول ەشكىمگە قويار ارىز-شاعىمى جوق ەكەنىن، ەشقانداي زاڭ بۇزۋشىلىق بولماعانىن جەتكىزدى»، - دەلىنگەن تۇركىستان وبلىسى پوليتسيا دەپارتامەنتىنىڭ باسپا ءسوز قىزمەتى تاراتقان حابارلامادا.
ال جەلىدەگى جازباعا پىكىر بىلدىرۋشىلەردىڭ باسىم بولىگى جاس وتباسىنا باقىت تىلەسە، ەندى ءبىر بولىگى قولحات جازعان قالىڭدىقتىڭ ىسىنە تاڭدانىسىن ءبىلدىردى.
ولاردىڭ اراسىندا «XXI عاسىردا نە دەگەن الىپ قاشۋ؟»، «نە ءۇشىن الىپ قاشادى؟»، «ءوز ەركىمەن كەلمەگەن، مىنا ەنەسى ماجبۇرلەپ وتىر، بۇلاردى ستاتيامەن قاماپ تاستاۋ كەرەك»، «ەرتەڭ كۇيەۋىنەن تاياق جەسە، وكىنىپ قالادى-اۋ» دەگەن پىكىرلەر دە بار.
