مەملەكەتتىك قىزمەت كورسەتۋ: قازاقستان كوشباسشى ەلدەردىڭ «ۆ» توبىنان «ا» توبىنا كوتەرىلدى

سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ مالىمەتىنشە، GovTech جاھاندىق سەرىكتەستىگىنىڭ قولداۋىمەن ەنگىزىلگەن دۇنيەجۇزىلىك بانكتىڭ GovTech جەتىلۋ يندەكسى (GTMI) سالاسىنىڭ نەگىزگى ءتورت باعىتىنىڭ دامۋىن باعالايدى. ناقتى ايتقاندا، نەگىزگى مەملەكەتتىك جۇيە يندەكسى (CGSI)، مەملەكەتتىك قىزمەت كورسەتۋ يندەكسى (PSDI)، ازاماتتاردى سيفرلىق سالاعا تارتۋ يندەكسى(DCEI) جانە مەملەكەتتىك تەحنولوگيالاردى قولداۋ يندەكسى (GTEI).
قازاقستان 198 ەل اراسىندا مەملەكەتتىك قىزمەت كورسەتۋ يندەكسى (PSD) بويىنشا 6-ورىنعا تۇراقتاعان. ايتا كەتۋ كەرەك، 2022-جىلعى كورسەتكىشتەر بويىنشا قازاقستان جەتىلۋ يندەكسىندە (GTMI) ايتارلىقتاي ناتيجە كورسەتتى. وسىلايشا جاھاندىق رەيتينگتە ەلىمىز ۆ توبىنان ا توبىنا اۋىستى. بۇل ەلدەگى GovTech سالاسىنىڭ دامىپ كەلە جاتقانىن كورسەتەدى.
سونداي-اق بۇگىندە قازاقستان ب ۇ ۇ- نىڭ ەلەكتروندىق ۇكىمەتتى دامىتۋ بويىنشا جاھاندىق رەيتينگىندە (EGDI) 28-ورىندا جانە جوعارى ناتيجەلى ەلدەر توبىنا كىرەدى. سونداي-اق ەلىمىز ونلاين قىزمەتتەر سالاسىنداعى الەمدىك رەيتينگتە دە ىلگەرى ورىندا. ونلاين سەرۆيستەردى ۇسىنۋ بويىنشا ەلىمىز 8- ورىندى يەلەنىپ، ۇزدىك 10 ەلدىڭ قاتارىندا تۇر. بۇل بەدەلدى تىزىمگە ەستونيا، فينليانديا، وڭتۇستىك كورەيا، دانيا، سينگاپۋر، جاڭا زەلانديا، اۆستراليا، ا ق ش جانە جاپونيا سياقتى ەلەكتروندىق ۇكىمەتتىڭ كوشباسشى ەلدەرى دە كىرگەن.
GovTech - حالىققا مەملەكەتتىك قىزمەت كورسەتۋ جانە بيلىك ورگاندارى مەن مەملەكەتتىك ينستيتۋتتار جۇمىسىنىڭ تيىمدىلىگىن ارتتىرۋ تەحنولوگيالارى سالاسى.