19:12, 25 - شىلدە 2023 | GMT +5
عالىمدار اپتاپ ىستىقتىڭ سەبەبىن ايتتى
استانا. قازاقپارات - سولتۇستىك جارتىشارداعى اپتاپ ىستىق قازبا وتىندارىنىڭ جانۋىنان تۋىنداعان - World Weather Attribution عالىمدارى وسىنداي قورىتىندىعا كەلدى، دەپ حابارلايدى قازاقپارات Euronews-كە سىلتەمە جاساپ.

ءولىم القابىنىڭ ءتۇتىنى بۇكىل سولتۇستىك جارتىشارعا تارالىپ جاتىر. كاليفورنيا ۇلتتىق پاركىندە جەردەگى ەڭ جوعارى تەمپەراتۋرا + 50 گرادۋستان تىركەلىپ جاتىر. مۇندا سۋسىز جانە قورعانىسسىز ءجۇرۋ وتە قاۋىپتى.
World Weather Attributio توبىنىڭ ماماندارى جۇرگىزگەن زەرتتەۋگە سايكەس، سولتۇستىك امەريكا، ەۋروپا مەن ازياداعى اپتاپ ىستىق انتروپوگەندى كليماتتىق كريزيس سالدارىنان بولىپ وتىر. ول قازبا وتىندارىن ورتەۋدەن تۋىنداعان جاھاندىق جىلىنۋ سالدارىنان ورىن الدى.
زەرتتەۋگە سايكەس، اتموسفەرادا كومىرقىشقىل جانە پارنيكتىك گازداردىڭ جينالۋىنان تەمپەراتۋرا ەۋروپادا 2,5، سولتۇستىك امەريكادا 2، قىتايدا 1 گرادۋسقا كوتەرىلگەن.
ساراپشىلاردىڭ پىكىرىنشە، بارلىق جەردە جىلۋ تولقىندارى قارقىندى، ءجيى جانە ۇزاعىراق بولۋى مۇمكىن.