ەگىن وراعى كەزىندە فەرمەرلەرگە ديزەل وتىنى تومەن باعامەن وتكىزىلەدى

ەنەرگەتيكا مينيسترلىگىنىڭ مالىمەتىنشە، اۋىل شارۋاشىلىعى مينيسترلىگىنىڭ جانە جەرگىلىكتى اتقارۋشى ورگانداردىڭ وتىنىمدەرى نەگىزىندە 2023-جىلعى كۇزگى ەگىن وراعىنا فەرمەرلەرگە 426 مىڭ توننا ديزەل وتىنى ءبولىندى. اتاپ ايتقاندا، ەنەرگەتيكا مينيسترلىگى وتىندى اۋىل شارۋاشىلىعى تاۋارىن وندىرۋشىلەر ءۇشىن 284 مىڭ تەڭگە/توننا سوماسىندا ۇسىندى. بۇل رەتتە مۇناي وڭدەۋ زاۋىتىنداعى باعا 1 ليترىنە 239 تەڭگەدەن ەسەپتەلىپ وتىر. دەگەنمەن، جەتكىزىلەتىن ءوڭىردىڭ قاشىقتىعىنا جانە وڭىرلىك وپەراتورلاردىڭ شىعىندارىنا قاراي، فەرمەرلەر ءۇشىن ورتاشا باعا 1 ليترىنە شامامەن 257 تەڭگە بولدى.
«قازىرگى كەزدە جانار-جاعارماي قۇيۋ ستانسيالارىنداعى ديزەل وتىنىنىڭ شەكتى بولشەك باعاسى 1 ليترىنە 295 تەڭگە شاماسىندا. جالپى، بولشەك ساۋدا قۇنى (295 تەڭگە/ليتر) مەن اۋىل شارۋاشىلىعى تاۋارلارىن وندىرۋشىلەرگە كۇزگى كەزەڭگە ارنالعان ديزەل وتىنىنىڭ باعاسى (257 تەڭگە/ ليتر) اراسىنداعى ايىرماشىلىق %14,8 (شامامەن 38 تەڭگە جەڭىلدىك) بولدى»، - دەلىنگەن مينيسترلىك حابارلاماسىندا.
قازاقستاندا ەگىن وراعى شىلدە ايىنان باستاپ قاراشا ايىن قوسا العانداعى ۋاقىتتى قامتيدى. شىلدە ايىندا ديزەل وتىنىن جەتكىزەتىن وڭىرلىك وپەراتورلار كۇزگى ەگىن وراعىنا بولىنگەن كولەمنىڭ تەك 4,5 مىڭ تونناسىن نەمەسە 1 پايىزىن جونەلتتى.
ەرەجەگە سايكەس جەرگىلىكتى اتقارۋشى ورگانداردىڭ كوميسسيالارى فەرمەرلەرگە ديزەل وتىنىن جەتكىزەتىن وڭىرلىك وپەراتورلاردى ايقىندايدى. كوميسسيا قۇرامىنا اكىمدىكتەردىڭ، پروكۋراتۋرا ورگاندارىنىڭ (كەلىسىم بويىنشا)، سىبايلاس جەمقورلىققا قارسى ءىس-قيمىل ورگاندارىنىڭ (كەلىسىم بويىنشا)، قوعامدىق ۇيىمداردىڭ، «اتامەكەن» ۇ ك پ وڭىرلىك كاسىپكەرلەر پالاتاسىنىڭ جانە جەكە كاسىپكەرلىك سۋبەكتىلەرى بىرلەستىكتەرىنىڭ وكىلدەرى كىرەدى.