يزرايل جوعارعى سوت تۋرالى داۋلى زاڭ جوباسىن قابىلدادى

64 پارلامەنت مۇشەسى ماقۇلداپ، قارسى شىققاندار بولماعان زاڭ جوباسى جوعارعى سوتتى يزرايل ۇكىمەتىنىڭ نەگىزسىز دەپ تاپقان ارەكەتتەرىن توقتاتۋ قۇقىعىنان ايىرادى. بۇل - سوت بيلىگىن شەكتەۋگە باعىتتالعان رەفورمالاردىڭ ىشىندە ماقۇلدانعان العاشقىسى. قارسىلىق تانىتۋشىلاردىڭ پىكىرىنشە، رەفورما ەلدەگى دەموكراتيا نەگىزدەرىنە قايشى كەلەدى. وتكەن اپتادا يزرايل پرەمەر- ءمينيسترى بينيامين نەتانياحۋ زاڭ جوباسىنا قاتىستى داۋىس بەرۋدەن باس تارتۋى، ءتىپتى كەيبىر بولىكتەرىن جۇمسارتۋى مۇمكىن دەگەن قاۋەسەت تاراعانىمەن، 73 جاستاعى كوشباسشى، كەرىسىنشە، ونى قولداپ، كەشە اۋرۋحانادان شىققاننان كەيىن پارلامەنتكە كەلدى. BBC News جازۋىنشا، دۇيسەنبى تاڭەرتەڭ يزرايل پارلامەنتى عيماراتى جانىنداعى بۋلۆاردى جاۋىپ قالعان نارازى توپقا سۋاتقىشپەن وق اتىلعان. جەرگىلىكتى باق اقپاراتى بويىنشا، قارسىلىققا شىققان ءبىر ادام جارالانىپ، التاۋى تۇتقىندالعان. نارازى توپتىڭ باسقا وكىلدەرى پوليتسيا فۋرگونىن قورشاۋعا الىپ، وفيتسەرلەرگە «ماسقارا» دەپ داۋىستادى. داۋلى رەفورما يزرايل تاريحىنداعى ەڭ كۇردەلى ىشكى داعدارىستى تۋدىردى. جىل باسىنان بەرى ءجۇز مىڭداعان دەمونسترانت اپتا سايىن كوشەگە شىعىپ، دەموكراتياعا شابۋىل جاسالعانىنا قارسىلىق بىلدىرەدى. ۇكىمەت رەفورما دەموكراتيانى نىعايتاتىنىن، كەيىنگى ونجىلدىقتا جوعارعى سوتتىڭ ساياساتقا بيلىگى كوپ بولىپ كەتكەنىن ايتتى.
بۇعان دەيىن ءيزرايلدىڭ تەل-اۆيۆ قالاسىندا 150 مىڭنان استام ادام سوت رەفورماسىنا قارسى تاعى دا شەرۋگە شىققانىن جازعان ەدىك. جىل باسىنان بەرى 28-رەت ميتينگىگە شىققان جۇرتتىڭ قالاۋى - پارلامەنتتىڭ وكىلەتتىگىن كۇشەيتىپ، جوعارى سوتتىڭ قۇزىرەتىن شەكتەيتىن سوت رەفورماسىنان باس تارتۋ.