ەكۆادوردا قالا مەرىن اتىپ كەتتى

مانتا. قازاقپارات - ەكۆادور قالالارىنىڭ ءبىرىنىڭ مەرى قۇرىلىس نىسانىن تەكسەرۋ كەزىندە جاسالعان شابۋىل سالدارىنان وققا ۇشتى، دەپ حابارلايدى قازاقپارات BBC گە سىلتەمە جاساپ.
None
Photo: Pixabay

جەكسەنبى كۇنى مانتا قالاسىنىڭ مەرى اگۋستين ينترياگو قارۋلى قىلمىسكەردىڭ شابۋىلى سالدارىنان بىرنەشە جاراقات الدى. سونداي-اق شابۋىل كەزىندە مەردىڭ قاسىندا بولعان جەرگىلىكتى فۋتبولشى اريانا ەستەفانيا چانكاي دا قايتىس بولدى.

پوليتسيا ازىرگە شابۋىلشىنى انىقتاعان جوق، ءبىراق مەر ينترياگونى بوپسالاعانىن راستادى. رەسمي تۇلعالاردىڭ ايتۋىنشا، ۇرلانعان كولىكپەن كەلگەن قارۋلى ادام مەرگە بىرنەشە رەت وق اتقان. ول العان جاراقاتىنان اۋرۋحانادا كوز جۇمدى.

كولىكتى جۇرگىزگەن ادام قۋعىن كەزىندە جارالانىپ، قاماۋعا الىندى. ال وق اتقان ادام ءىزىن جاسىرىپ ۇلگەرگەن.

مەر ينترياگو اقپان ايىندا ءتورت جىلدىق مەرزىمگە قايتا سايلاندى. شابۋىل كەزىندە ول جاڭا كارىز جۇيەسى سالىنىپ جاتقان قۇرىلىس الاڭىن تەكسەرىپ جۇرگەن. سول ساتتە ونىڭ قاسىنا جەرگىلىكتى «لاس دراگوناس» كلۋبىنىڭ 29 جاستاعى فۋتبولشىسى اريانا چانكاي كەلىپ، قالا مەرىنەن كومانداسىنا قولداۋ كورسەتۋىن وتىنگىسى كەلگەن. بۇل جاعداي ەكۆادور حالقىن ءدۇر سىلكىندىردى.

اقپان ايىندا پۋەرتو-لوپەس مەرلىگىنە ۇمىتكەر ساياساتكەر سايلاۋ ۋچاسكەلەرى اشىلۋىنا بىرنەشە ساعات قالعاندا ولتىرىلگەن. وسىدان بىرنەشە اپتا بۇرىن تاعى ءبىر جاعالاۋداعى ساليناس قالاسىنىڭ مەرلىگىنە ۇمىتكەر دە وققا ۇشقان بولاتىن.

سوڭعى جاڭالىقتار