شەتەلدىك ب ا ق-تاعى قازاقستان: گەرمانيا پرەزيدەنتىنىڭ ساپارى، سيريا كەلىسسوزىنىڭ توقتاتىلۋى جانە قازاقستانعا ەكى اپتالىق ساياحات
Deutsche Welle: گەرمانيا مەن قازاقستان ارىپتەستىكتى ودان ءارى نىعايتۋدى ماقسات ەتىپ وتىر
22-ماۋسىمدا نەمىستىڭ Deutsche Welle باسىلىمى گەرمانيا پرەزيدەنتى فرانك-ۆالتەر شتاينمايەر مەن قازاقستان پرەزيدەنتى قاسىم- جومارت توقايەۆتىڭ كەزدەسۋى جونىندە ماقالا جاريالادى. ەسكە سالايىق، 20-ماۋسىم كۇنى گەرمانيا پرەزيدەنتى قازاقستانعا ساپارمەن كەلگەن ەدى.
اتالعان باسىلىمنىڭ جازۋىنشا، ەكى ەل باسشىسى مەملەكەتتەر اراسىنداعى ارىپتەستىكتى ايماقتاعى نەگىزگى سەرىكتەستەردىڭ ىنتىماقتاستىعى رەتىندە قاراستىرادى.
«نەمىس- قازاق ساۋداسىنىڭ جالپى كولەمى شامامەن 9 ميلليارد ەۋرونى (8,2 ميلليارد دوللار) قۇرايدى، گەرمانيانىڭ ورتالىق ازياداعى سىرتقى ساۋداسىنىڭ %85 قازاقستاندىق كومپانيالار ارقىلى جۇزەگە اسادى»، دەلىنگەن باسىلىمدا.
Thediplomat: قازاقستانداعى ءورت ءۇشىن كىم جاۋاپتى؟
23-ماۋسىمدا Thediplomat باسىلىمى ايدىڭ باسىندا «قازاقستاننىڭ شىعىسىندا بولعان ءورت ءۇشىن كىم جاۋاپ بەرەدى؟» دەگەن ساۋالعا جاۋاپ ىزدەپ كوردى. باسىلىمنىڭ جازۋىنشا، 15-ماۋسىمدا قازاقستاننىڭ توتەنشە جاعدايلار مينيسترلىگى اباي وبلىسىنداعى اۋقىمدى ورمان ءورتىن باقىلاۋعا العانىن حابارلاعان. دەگەنمەن ءبىرقاتار قازاقستاندىقتار ۇكىمەتتىڭ توتەنشە جاعدايدى قالاي اۋىزدىقتاپ جاتقانىنا نارازى.
«كىم جاۋاپقا تارتىلۋى كەرەك جانە ونىڭ سالدارى قانداي دەگەن ساۋال قازىر قازاقستاندىق قوعامدا قىزۋ تالقىعا ءتۇسىپ جاتىر. باس پروكۋرور ءورتتىڭ شىعۋ سەبەبى بويىنشا قىلمىستىق ءىس قوزعايتىنىن مالىمدەدى. توقايەۆ بىرنەشە مەملەكەتتىك قىزمەتشىگە سوگىس جاريالادى. الايدا كىمنىڭ قالاي جانە قانداي دارەجەدە جازالانىپ جاتقانىندا ايىرماشىلىق بار»، دەپ جازادى اتالعان باسىلىم.
Reuters: قازاقستان كەنەتتەن استاناداعى سيريا بويىنشا كەلىسسوزدەردى توقتاتۋدى ۇسىندى
21-ماۋسىمدا Reuters اگەنتتىگى رەسەي، تۇركيا جانە يران اراسىنداعى سيريا بويىنشا بەيبىت كەلىسسوزدەردى وتكىزىپ كەلگەن قازاقستان كۇتپەگەن جەردەن پروتسەستى توقتاتۋدى ۇسىنعانى جونىندە ماتەريال جاريالادى. رەسەي تاراپى كەزدەسۋلەردىڭ ەندى باسقا جەردە جالعاسۋى مۇمكىن ەكەنىن ايتقان.
«ءۇش ەلدىڭ ديپلوماتتارى جەرگىلىكتى جەردەگى جاعدايدى، تۇركيا مەن سيريا اراسىنداعى بايلانىستى قالپىنا كەلتىرۋدىڭ جول كارتاسىن، يزرايلدىڭ شابۋىلدارىن جانە باسقا دا كوپتەگەن ماسەلەنى تالقىلاۋ ءۇشىن وسى اپتادا قازاقستان استاناسى استانادا 20-رەت باس قوستى»، - دەپ جازادى باسىلىم.
Pakistanobserver: يدب ينستيتۋتى قازاقستاندا يسلامدىق قارجىلاندىرۋ بويىنشا سەمينار ۇيىمداستىردى
23-ماۋسىمدا Pakistanobserver باسىلىمى يسلام دامۋ بانكى ينستيتۋتى (ي د ب) Astana Finance Days 2023 باعدارلاماسى شەڭبەرىندە يسلامدىق قارجىلاندىرۋ بويىنشا سەمينار ۇيىمداستىرعانى جونىندە ماقالا جاريالادى. باسىلىمنىڭ جازۋىنشا، اتالعان ينستيتۋت استانا حالىقارالىق قارجى ورتالىعىمەن (احقو) بىرلەسىپ وتكىزگەن. وعان تەك قازاقستاننان عانا ەمەس، ورتالىق ازيا ايماعىنان جانە ودان دا باسقا جەرلەردەن كوپتەگەن قاتىسۋشى كەلگەن.
«سەمينار ەكى سەسسياعا ءبولىندى، ونىڭ ءبىرىنشىسى يسلامدىق بانكينگكە ارنالدى. سەسسيا جالپى ورتالىق ازيا ايماعىندا، اتاپ ايتقاندا قازاقستاندا شاريعات تالاپتارىنا ساي قارجىلىق قىزمەتتەرگە سۇرانىستىڭ ارتۋىنا بايلانىستى بيزنەس مۇمكىندىكتەرىن قۇرۋ جانە يسلام بانكتەرىنىڭ ۇلتتىق دامۋ ماقساتتارىنا قول جەتكىزۋ ماسەلەلەرىنە ارنالدى» ، دەپ جازىلعان.
Interfax: ازەربايجان مەن قازاقستان پرەمەر- مينيسترلەرى كولىك جانە ەنەرگەتيكا سالاسىنداعى ىنتىماقتاستىقتى تالقىلادى
22-ماۋسىم كۇنى Interfax اگەنتتىگى بەيسەنبى كۇنى باكۋدە وتكەن كەزدەسۋدە ازەربايجان پرەمەر- ءمينيسترى ءالي اسادوۆ پەن قازاقستان پرەمەر-ءمينيسترى ءاليحان سمايىلوۆ كەزدەسىپ، كوپتەگەن ماسەلەنى، ونىڭ ىشىندە كولىك- لوگيستيكا، ەنەرگەتيكا جانە اۋىل شارۋاشىلىعى سالالارىنداعى ىنتىماقتاستىقتى تالقىلاعانى تۋرالى ماتەريال جاريالادى.
«كەلىسسوز بارىسىندا ەكى تاراپ ساۋدا، كولىك-لوگيستيكا، ەنەرگەتيكا، اۋىل شارۋاشىلىعى سياقتى سالالارداعى ءوزارا ءىس-قيمىل اسپەكتىلەرىن ەگجەي-تەگجەيلى تالقىلادى. سونىمەن قاتار بىرلەسكەن IT-جوبالاردى جانە مادەني-گۋمانيتارلىق باستامالاردى جۇزەگە اسىرۋ جوسپارلارى قاراستىرىلدى»، دەپ جازادى اگەنتتىك قازاقستان ۇكىمەتىنە سىلتەمە جاساپ.
Trend.az: ازەربايجان مەن قازاقستان اراسىنداعى قارىم- قاتىناستار بارلىق سالادا دامىپ جاتىر - پرەزيدەنت يلحام اليەۆ
22-ماۋسىمدا Trend.az باسىلىمى ازەربايجان پرەزيدەنتى يلحام اليەۆ ق ر پرەمەر-ءمينيسترى ءاليحان سمايىلوۆتى قابىلداپ، ەكى تاراپتىڭ ءبىرقاتار ماسەلەنى تالقىلاعانى جونىندە ماقالا جاريالادى. باسىلىمنىڭ ايتۋىنشا، كەلىسسوز بارىسىندا اليەۆ ازەربايجان مەن قازاقستان اراسىنداعى قارىم-قاتىناس بارلىق سالادا تابىستى دامىپ جاتقانىن تىلگە تيەك ەتكەن.
«ازەربايجان مەن قازاقستان اراسىنداعى قارىم-قاتىناستاردىڭ ستراتەگيالىق سيپاتىن اتاپ وتكەن يلحام اليەۆ ەكىجاقتى بايلانىستاردىڭ بارلىق سالادا تابىستى دامىپ كەلە جاتقانىن ايتىپ، ەكىجاقتى قارىم-قاتىناستاردىڭ كۇن ءتارتىبى تالقىلانعانىن اتاپ ءوتتى»، دەپ جازادى باسىلىم.
Lonelyplanet: قازاقستاندى پويىزبەن ارالاۋ: وتكەن داۋىرگە ەكى اپتالىق ساياحات
21-ماۋسىم كۇنى Lonelyplanet اتتى ساياحات جايلى جازاتىن جۋرنالدا Juan Martinez ەسىمدى ساياحاتشى- جۋرناليستىڭ قازاقستانعا ەكى اپتالىق ساياحاتى تۋرالى ماقالا جارىق كوردى. ول قازاقستاندى ەكى اپتا بويىنا پويىزبەن ارالاعان. «ءبىر كەزدەرى كوپشىلىك بىلە بەرمەيتىن ءارى كوپ ادامعا قولجەتىمسىز بولعان قازاقستان بۇگىندە باتىل دا باتىر ساياحاتشىلاردى قۇشاق جايىپ قارسى الادى»، - دەپ باستايدى اۆتور.
«قازاقستان سياقتى ورتالىق ازيا ەلىنىڭ جىبەك جولى داستۇرلەرى، كەڭەس ءداۋىرىنىڭ قالدىقتارى مەن شەگى كورىنبەي سوزىلىپ جاتقان ادەمى پەيزاجداردى بىرىكتىرىپ ۇسىناتىنى تاڭ قالدىرادى»، - دەپ جازادى اۆتور.
BBC: ەۋرو-2024 ىرىكتەۋ كەزەڭى: سولتۇستىك يرلانديانىڭ قازاقستاننان جەڭىلۋى ىرىكتەۋ كەزەڭىندەگى ءۇمىتتى ءوشىردى
20-ماۋسىمدا 2024 -جىلعى ەۋروپا چەمپيوناتىنا ىرىكتەۋ ساتىسىنىڭ ءتورتىنشى تۋرىندا قازاقستان مەن سولتۇستىك يرلانديا فۋتبول كوماندالارى كەزدەسكەن ەدى. ويىن قازاقستان پايداسىنا 1-0 بولىپ اياقتالدى.
باسىلىمنىڭ جازۋىنشا، وتكەن جەلتوقسان ايىندا مايكل و'نيل سولتۇستىك يرلانديا كومانداسىنىڭ باپكەرى بولىپ قايتا تاعايىندالدى. وسىدان كوماندانىڭ جانكۇيەرلەرى سولتۇستىك يرلانديا 2024 -جىلعى ەۋرو-2024 ىرىكتەۋ كەزەڭىنەن سۇرىنبەي وتەدى دەپ ۇمىتتەنگەن ەدى.
«جەلتوقسان ايىنىڭ باسىندا جاڭا قىزمەتكە كىرىسكەن كەزدە و'نيل كوماندا ىرىكتەۋدەن وتەتىنىنە سەنەتىنىن ايتقان ەكەن. الايدا، دۇيسەنبىگە قاراعان ءتۇنى قازاقستاننان 1:0 ەسەبىمەن جەڭىلگەننەن كەيىن ءبارى بەلگىلى بولدى. وسىدان سوڭ و'نيل سولتۇستىك يرلانديانىڭ 2016 -جىلعى ەرلىگىن قايتالاي المايدى كەم دەگەندە، بۇل ناۋقاندا ەمەس»، - دەپ جازادى باسىلىم.
اۆتور:
نازەركە سۇيىندىك
