اباي وبلىسىندا ەنەسى مەن كەلىنى قارجى پيراميداسىن ۇيىمداستىرعان
ءىس ماتەريالدارىنا سايكەس، ا. 2020-جىلى اسا ءىرى كولەمدە اقشا جيناپ، پايدا تابۋ ماقساتىن كوزدەگەن.
«وسى ماقساتتا ا. ەسىمدى ايەل قارجى پيراميداسىن قۇرۋ جانە باسقارۋ جوسپارىن جاسادى. وعان ول ءوزىنىڭ كەلىنى ە. ەسىمدى ايەلدى تارتتى. بەرىلگەن تاپسىرماعا سايكەس، كەلىنى سالىمشىلاردى تارتۋمەن، ولاردىڭ ءتىزىمىن جاساۋمەن، اۋدارىلعان قاراجاتتارىنىڭ ەسەبىن جۇرگىزۋمەن جانە ولاردى سالىمشىلار اراسىندا قايتا بولۋمەن اينالىسقان»، - دەدى ۆەدومستۆو وكىلدەرى.
العا قويعان ماقساتتارىنا جەتۋ ءۇشىن ايەلدەر WhatsApp جەلىسى مەن Telegram ارناسىندا توپ اشقان. وندا سالىمشىلاردى تارتۋ ءۇشىن ولار ماركەتينگ جوسپارلارى تۇرىندەگى اقپاراتتى جاريالاعان.
«ولار پيراميداعا قاتىسۋشىلاردى ۇيرەتۋ ءۇشىن «قوراپتار» دەپ اتالاتىن توپ اشىپ، ول جەردە پايىزدار بويىنشا سالىمدار مەن تولەمدەردىڭ مولشەرىن انىقتاپ وتىرعان. 2020-جىلدىڭ قاڭتار-شىلدە ايلارى ارالىعىندا اسا ءىرى مولشەردە 230 ميلليون تەڭگەگە جۋىق قاراجات جيناعان.
سوت ولاردى قىلمىستىق كودەكستىڭ 217-بابى (قارجىلىق پيراميدانى قۇرۋ جانە وعان باسشىلىق ەتۋ) بويىنشا كىنالى دەپ تانىپ، ازاماتتاردىڭ قاراجاتى مەن ينۆەستيتسيالارىن تارتۋعا بايلانىستى قىزمەتپەن اينالىسۋ قۇقىعىنان ايىرا وتىرىپ، بەس جىل مەرزىمگە باس بوستاندىعىنان ايىرۋ جازاسىن تاعايىندادى. ولار جازاسىن ەڭ تومەنگى قاۋىپسىزدىك قىلمىستىق-اتقارۋ جۇيەسى مەكەمەسىندە وتەيدى»، - دەدى قىلمىستىق اتقارۋ دەپارتامەنتى وكىلدەرى.
