وگايو شتاتىندا ەكى جاسار ءسابي جۇكتى اناسىن اتىپ تاستادى
قايعىلى وقيعا وتكەن اپتادا نورۋولك قالاسىندا بولعان، ءبىراق ول تۋرالى ەندى عانا بەلگىلى بولدى. جەرگىلىكتى پوليتسيانىڭ حابارلاۋىنشا، 31 جاستاعى لورا يلگ 911 نومىرىنە قوڭىراۋ شالىپ، ديسپەتچەرگە جۇكتىلىكتىڭ 33 اپتاسىندا ەكەنىن جانە ەكى جاسار ۇلى ارقاسىنا وق اتقانىن حابارلاعان.
وقيعا ورنىنا پوليتسيا قىزمەتكەرلەرى ونىڭ العاشقى قوڭىراۋىنان ءۇش مينۋت وتكەن سوڭ 13:14 تە جەتكەن. اناسى دا، ەكى جاسار ۇلى دا جوعارعى قاباتتاعى جاتىن بولمەدەن تابىلادى. تاپانشا دا سوندا بولعان. اناسىنىڭ ءوتىنىشى بويىنشا ۇلى بولمەدەن شىعارىلعان.
جۇكتى ايەل فيشەر تيتۋس مەديتسينالىق ورتالىعىنا جەتكىزىلىپ، شۇعىل تۇردە كەسار تىلىگى جاسالدى. لورانىڭ ىشتەگى بالاسى 911 قىزمەتىنە قوڭىراۋ شالعاننان كەيىن ءبىر ساعاتقا جەتپەي قايتىس بولعانى انىقتالدى، ال ايەلدىڭ ءوزى ساعات 17:10 دا كوز جۇمدى.
ۇلى اناسىن SIG Sauer P365 تاپانشاسىمەن اتقان. يلگ پەن ونىڭ كۇيەۋى مىلتىق جاتىن بولمەدەگى تۋمبوچكادا ساقتالعانىن ايتتى. پوليتسيانىڭ حابارلاۋىنشا، ۇيدە تاعى 12 كاليبرلى شولاق مىلتىق پەن پنيەۆماتيكالىق تاپانشا بولعان.
ەشقانداي ايىپ تاعىلعان جوق. پوليتسيا تەرگەۋ ناتيجەسى جەرگىلىكتى پروكۋراتۋراعا بەرىلەتىنىن مالىمدەدى.
