قازاقستاندىقتار كەپىل رەتىندە قۇجات تاستاۋعا مىندەتتى مە؟ زاڭگەر جاۋابى

None
استانا. قازاقپارات - قازاقستاندا كەپىل رەتىندە جەكە باسىن كۋالاندىراتىن قۇجات سۇرايتىن جاعدايلار ءجيى كەزدەسەدى. كومپانيالاردىڭ بۇل ارەكەتى زاڭدى ما؟

بۇل سۇراققا Tengri Life-كە قازاقستاندىق زاڭگەر دانيار بايعاباتوۆ جاۋاپ بەردى.

قۇجاتتى تاستاۋ كەرەك پا الدە جوق پا؟

دانيار بايعاباتوۆ كەپىل رەتىندە قۇجات تاستاۋعا كەڭەس بەرمەيدى. ونىڭ ايتۋىنشا، كومپانيانىڭ سىزدەن جەكە كۋالىك نەمەسە ءتولقۇجات تاستاۋىڭىزدى سۇراۋعا ەش قۇقىعى جوق.

«ۇيىمدار مەن باسقا دا تۇلعالاردىڭ مۇنداي تالاپتارى زاڭسىز بولىپ تابىلادى. كەپىل - مىندەتتەمەنىڭ ورىندالۋىنا كەپىلدىك بەرۋ ءتاسىلى. قولدانىستاعى زاڭناماعا سايكەس، كەپىل كەلىسىم-شارت نەگىزىندە جاسالادى. اۋىزشا كەلىسىم جاساۋعا بولمايدى، ونىڭ زاڭدى كۇشى جوق. ەڭ دۇرىسى، كەپىل شارتىن جاساعان ءجون. زاڭ بويىنشا، قۇجاتتاردى كەپىلگە قالدىرۋدى سۇراۋعا بولمايدى»، - دەدى زاڭگەر.

كەپىلگە قۇجات قالدىرساڭىز، جەكە مالىمەتتەرىڭىزدىڭ تاراپ كەتۋ قاۋپى بار.

ء«قازىر كەيدە نەسيە راسىمدەۋ ءۇشىن ادامنىڭ جسن ءنومىرىن ءبىلۋ عانا جەتكىلىكتى. سوندىقتان قۇجاتتاردى كەپىل رەتىندە تاستاماڭىز. كەپىل شارتىن جاساپ، بارلىق شارتتاردى سول قۇجاتتا جازۋعا كەڭەس بەرەمىن»، - دەپ جالعاستىردى مامان.

ءسىزدىڭ قۇجاتىڭىزدى كەپىلگە تاستاۋدى سۇراعان ادام دا تاۋەكەل ەتەدى.

«ازاماتتان مۇنداي قۇجات سۇراعان ادام دا تاۋەكەل ەتەدى. جەكە باسىن كۋالاندىراتىن قۇجاتتار مۇلىك ەمەس. ياعني، قانداي دا ءبىر جاعدايدا ونى كەپىلگە قويىپ، كەيىن ساتۋعا كەلمەيدى»، - دەدى ول.

ەگەر قانداي دا ءبىر ۇيىم كەپىلگە قۇجات تاستاۋىڭىزدى سۇراسا نە ىستەۋ كەرەك؟

زاڭگەردىڭ ويىنشا، ەگەر كەپىل رەتىندە قۇجات تاستاۋدى سۇراسا، پوليتسيا قىزمەتكەرلەرىن شاقىرىپ، اكىمشىلىك حاتتاما قۇرۋىن سۇراۋ كەرەك.

«الايدا ەگەر ادام كەپىل رەتىندە ءسىزدىڭ قۇجاتىڭىزدى ءالى الماعان بولسا، ونى جاۋاپكەرشىلىككە تارتا المايدى. سوندىقتان وسى نارسەنى دە ەسكەرۋ كەرەك»، - دەدى دانيار بايعاباتوۆ.

سونداي- اق، زاڭگەر جەكە كۋالىك نەمەسە ءتولقۇجات سياقتى قۇجاتتاردى كەپىلگە الۋ اكىمشىلىك قۇقىق بۇزۋشىلىق جايلى كودەكستىڭ 494-بابىنا سايكەس اكىمشىلىك قۇقىق بۇزۋشىلىق بولىپ سانالاتىنىن ەسكە سالدى.

«ازاماتتاردىڭ ءتولقۇجاتتارىن، جەكە كۋالىكتەرىن زاڭسىز العان بولسا نەمەسە كەپىلگە السا، ەسكەرتۋ جاسالادى نەمەسە بەس ايلىق ەسەپتىك كورسەتكىش كولەمىندە (شامامەن 17 مىڭ تەڭگە) ايىپپۇل سالىنادى. ەگەر بۇل فاكت ءبىر جىل ىشىندە قايتا تىركەلسە، وندا 10 ا ە ك (شامامەن 34500 تەڭگە) مولشەرىندە ايىپپۇل سالىنۋى مۇمكىن»، - دەدى زاڭگەر.

سوڭعى جاڭالىقتار