قولى مەن دەنەسىندە جارىلعىش زات بولدى - مارات قوجايەۆ استانادا بانك قىزمەتكەرلەرىن كەپىلگە العان باسقىنشى تۋرالى

None
Фото: t.me/POLICE_of_KZ
استانا. قازاقپارات - Kaspi بانك بولىمشەسىنىڭ قىزمەتكەرلەرىن كەپىلگە العان باسقىنشىنىڭ قولى مەن دەنەسىندە جارىلعىش زات بولدى.

بۇل جايىندا قازاقپارات تىلشىسىنە ەكسكليۋزيۆ سۇحبات بەرگەن ىشكى ىستەر ءمينيسترىنىڭ ءبىرىنشى ورىنباسارى مارات قوجايەۆ ايتتى، دەپ حابارلايدى قازاقپارات ءتىلشىسى.

مارات قوجايەۆ قاسكويمەن كەلىسسوز جۇرگىزۋ كەزىندەگى ءى ءى م قىزمەتكەرلەرىنىڭ جۇمىسى جايلى جان-جاقتى ايتىپ بەردى.

«ادامنىڭ اتى-ءجونىن جىلدامىراق انىقتاساق، ونىمەن كەلىسسوز جۇرگىزۋ دە جەڭىلىرەك بولادى. ال بۇل جاعدايدا ءبىز ونىڭ تۋعان-تۋىستارىن تارتتىق. ونى سۋرەتكە ءتۇسىرىپ الىپ، جىلدام بازامىزدان قاراپ، اتى-ءجونىن انىقتادىق. دەگەنمەن، باستاپقىدا ول مۇلدەم باسقا ادامنىڭ اتىن ايتقان بولاتىن. ءبىز ديلشوت دەگەن اداممەن كەلىسسوز جۇرگىزگەن ەدىك»، - دەدى مارات قوجايەۆ.

ءسال كەيىنىرەك، سۋرەت ارقىلى ونىڭ ناقتى كىم ەكەنى انىقتالدى. ول جامبىل وبلىسىنىڭ گرودەكوۆو ەلدى مەكەنىنىڭ تۋماسى ءاليحان مۋرادوۆ بولىپ شىقتى. دەرەكتەر ادام جايلى اقپارات جيناۋعا، ونىڭ مىنەز-قۇلقىن تانىپ بىلۋگە، جاقىن تۋعان-تۋىستارىنىڭ كىم ەكەندىگىن انىقتاۋعا مۇمكىندىك بەردى.

«ءبىز جامبىل وبلىسىنا حابارلاسىپ، ونداعى بولىمشەمىز تەز ارادا ونىڭ تۋعان-تۋىستارىن تاپتى. سولار ارقىلى وعان اسەر ەتۋگە تىرىستىق. سول ارقىلى ول جاساۋى مۇمكىن ءىس-ارەكەتتىڭ قاۋپىن ازايتتىق. بەيبىت جولمەن شەشۋگە تىرىستىق. كەلىسسوزدەردىڭ ەش اسەرى بولماعان جاعدايدا ءبىزدىڭ ارناۋلى بولىمشەمىز ارەكەت ەتۋى ءتيىس بولدى»، - دەدى ءمينيستردىڭ ءبىرىنشى ورىنباسارى.

ونىڭ ايتۋىنشا، توسىن جاي بولعان كەزدە استانا قالالىق پوليتسيا دەپارتامەنتىنىڭ «ارلان» جاساعى ىسكە كىرىسۋگە ءتيىس ەدى. ارناۋلى جاساق ءوزىنىڭ شتاتتىق كەستەسىنە ساي قارۋلانعان. قۇرامىندا ءتۇرلى ماماندار بار. ماسەلەن، قاتتى دىبىس شىعاراتىن گراناتا لاقتىراتىن مامان بولدى. گراناتا لاقتىرعان كەزدە جار-جۇرق ەتىپ، ساناۋلى سەكۋندتاردا قىلمىسكەر داعدارىپ قالادى. ال سول ۋاقىتتا شابۋىلداۋشىلار قىلمىسكەرگە جەتىپ، ونى قارۋسىزداندىرۋى ءتيىس.

مارات قوجان ءى ءى م بولىمشەسى وتە جىلدام ءارى مۇلتىكسىز جۇمىس ىستەدى دەپ سانايدى. قىلمىسكەر دە، تۇتقىنداعى بانك قىزمەتكەرلەرى دە زارداپ شەككەن جوق.

سونىمەن قاتار ول قاسكويدە قانداي قارۋ بولدى دەگەن ساۋالعا جاۋاپ بەردى.

«وندا تاپانشاعا ۇقساس زات بولدى. سونىمەن قاتار قولى مەن دەنەسىنە قولدان جاسالعان جارىلعىش قۇرىلعىعا ۇقساس زات تاڭىپ العان. قازىرگى ۋاقىتتا بۇل زاتتار ساراپتاماعا بەرىلدى. ولاردىڭ قانشالىقتى جارىلعىش زات نە مۋلياج ەكەندىگىن ساراپتاما انىقتايدى»، - دەدى مارات قوجايەۆ.

سوڭعى جاڭالىقتار