قازاقتىڭ ءداستۇرلى سۋسىنى ساۋمالدى قىتاي، ەۋروپا مەن ا ق ش-قا ەكسپورتقا شىعارۋعا نە كەدەرگى

None
Фото: primeminister.kz
استانا. قازاقپارات – ق ر پرەمەر- ءمينيسترىنىڭ ورىنباسارى - ساۋدا جانە ينتەگراتسيا ءمينيسترى سەرىك جۇمانعارين «AMANAT» پارتياسىنىڭ قوعامدىق قابىلداۋ الاڭىندا ازاماتتاردى ونلاين قابىلدادى، دەپ حابارلايدى primeminister.kz.

ۆيتسە-پرەمەردىڭ قابىلداۋىنا تىركەلگەن ازاماتتار ەكى ساعات ارالىعىندا سۇراقتارىن قويىپ، ماسەلەلەرىمەن ءبولىستى.

ولاردىڭ باسىم بولىگى وتاندىق ءونىمدى سىرتقى نارىقتارعا شىعارۋ، اۋىل شارۋاشىلىعى سالاسىنداعى جاڭا وندىرىستەردى مەملەكەتتىك قولداۋ، تۇركىستان وبلىسىنداعى سۋ تاپشىلىعى، ازىق-تۇلىك قاۋىپسىزدىگى جانە ت. ب. ماسەلەلەرگە قاتىستى بولدى.

قابىلداۋ بارىسىندا قازاقتىڭ ءداستۇرلى سۋسىندارى - قىمىز جانە شۇبات، تەرەڭ وڭدەلگەن ونىمدەر - قۇرعاق ساۋمال مەن قۇرعاق شۇبات ءوندىرۋ ماسەلەسى تالقىلاندى.

ونىمدەر نەمىس ستاندارتتارى بويىنشا سەرتيفيكاتتالعان جاڭا تەحنولوگيالار بويىنشا شىعارىلادى.

كاسىپكەر ءوز ونىمدەرىن ە و، ا ق ش، ق ح ر ەلدەرىنىڭ نارىقتارىنا جەتكىزۋگە مۇددەلى.

ونىڭ ايتۋىنشا، تۇيە ءسۇتىن ق ح ر-عا ساتۋ پروتسەسى ۇلتتىق ستاندارت بويىنشا جولعا قويىلعان بولسا، ساۋمالدى ۇلتتىق ستاندارتتىڭ بولماۋىنا بايلانىستى جەتكىزۋ ازىرگە مۇمكىن بولماي وتىر.

ال ەو جانە تۇركيا ەلدەرىنىڭ نارىقتارىنا جەتكىزۋگە جوعارى يمپورتتىق باجدار كەدەرگى، ويتكەنى بۇل ءونىم ءسۇت ونىمدەرىنىڭ جالپى ساناتىنا جاتادى.

سونداي-اق ا ق ش-تا جانۋارلاردىڭ كەي تۇرىنە جانە جانۋارلاردان الىناتىن كەي ونىمدەرگە، ونىڭ ىشىندە ساۋمال مەن شۇبات اكەلۋگە ۋاقىتشا شەكتەۋلەر بار.

سەرىك جۇمانعارين ساۋمالدى ەو ەلدەرىنە جانە تۇركياعا جەتكىزۋگە يمپورتتىق باج سالىعىنىڭ مولشەرىن ازايتۋ - بۇل ونىمگە س ە ق ت ن جەكە كودىن بەرگەننەن كەيىن باستالۋى مۇمكىن كەلىسسوز پروتسەسى ەكەنىن اتاپ ءوتتى.

قازىر بۇل ماسەلەمەن ساۋدا مينيسترلىگى اينالىسادى.

«بۇل - مەملەكەتتىڭ بيزنەسكە كومەكتەسۋى كەرەكتىگىنىڭ مىسالى. قىركۇيەك ايىندا ۇرىمشىدە كورمە وتەدى، وندا ق ح ر مەملەكەتتىك ورگاندارىنىڭ وكىلدەرىمەن ساۋمالعا ۇلتتىق ستاندارتتى ازىرلەۋ مۇمكىندىگىن ەگجەي-تەگجەيلى تالقىلاۋعا بولادى. ءبىزدىڭ ءونىمدى ەكسپورتتىق نارىقتارعا شىعارۋ مۇمكىندىگىن جەدەلدەتۋ ءۇشىن ا ق ش ەلشىلىگىمەن جانە ە و مەملەكەتتىك ورگاندارىمەن جۇمىستى جانداندىراتىن بولامىز»، - دەپ اتاپ ءوتتى سەرىك جۇمانعارين.

قابىلداۋ بارىسىندا ۆيتسە-پرەمەرگە تۇركىستان وبلىسىنان سولتۇستىك قازاقستان وبلىسىنا قونىس اۋدارعان ازامات ءوز ۇسىنىسىن جەتكىزدى.

ول جارتى جىلعا جۋىق مالى قوراعا قامالاتىن سولتۇستىك وڭىردە مال وسىرۋگە ارنايى بەيىمدەلگەن جوعارى قورەكتىك جەم داقىلدارىن ءوسىرۋ، جەم جانە ۆيتامين-مينەرالدى قوسپالاردى ءوندىرۋ بويىنشا پيلوتتىق جوبانىڭ بيزنەس- جوسپارىن ۇسىندى.

ونىڭ ايتۋىنشا، ونىڭ 7400 گەكتار جەرى بار، بۇل جايىلىمدار، شابىندىقتار، ەگىستىك جەرلەر.

فەرمەر بيزنەسىنىڭ باستاپقى كەزەڭىندە مەملەكەتتەن قارجىلىق قولداۋ سۇراپ وتىر.

ءوز كەزەگىندە سەرىك جۇمانعارين شارۋاعا ۇكىمەتتىڭ قولداۋىنا كەلگەنى ءۇشىن العىس ايتىپ، «اۋىل اماناتى» مەملەكەتتىك باعدارلاماسى اياسىندا شاعىن نەسيە الۋ مۇمكىندىگى تۋرالى حاباردار ەتتى.

ونىڭ ماقساتى - اۋىلداعى كاسىبي مامانداردى اۋىلدا قالۋعا ىنتالاندىرۋ. جەڭىلدەتىلگەن نەسيەلەۋ ءوز ايماعىندا شارۋاشىلىق قۇرۋعا مۇمكىندىك بەرەدى.

شاعىن نەسيەنى اكىمدىكتەر 5 جىلعا دەيىنگى مەرزىمگە (ال مال شارۋاشىلىعىنا 7 جىلعا دەيىن) جىلدىق %2,5 دان اسپايتىن تومەن سىياقى مولشەرلەمەسىمەن ۇسىنادى.

ميكروكرەديتتىڭ شەكتىك سوماسى 2,5 مىڭ ا ە ك، بۇل - 8,6 ميلليون تەڭگە. ال اۋىل شارۋاشىلىعى كووپەراتيۆتەرى ءۇشىن شەكتىك سوما 8 مىڭ ا ە ك نەمەسە 27,6 ميلليون تەڭگەگە دەيىن.

ۆيتسە-پرەمەر اۋىل شارۋاشىلىعى مينيسترلىگىنە فەرمەردى قولداۋدىڭ بارلىق مۇمكىن شارالارىن قاراستىرۋدى جانە بيزنەس- جوسپاردى تالقىلاۋعا سولتۇستىك قازاقستان وبلىسىنىڭ اكىمىمەن كەزدەسۋ ۇيىمداستىرۋدى تاپسىردى.

سونداي-اق كەزدەسۋ بارىسىندا جاسىل تاۋاردى (جەمىس-جيدەك، كوكونىس) ءوسىرۋ جانە ساتىپ الۋ، جەمىستەر مەن كوكونىستەردى تەرەڭ وڭدەۋ، كەدەن وداعىنىڭ تەحرەگلامەنتىن كەلىسۋ، ۆەتەريناريالىق قىزمەت جانە يەسىز جانۋارلاردى ۇستاۋ ماسەلەلەرى ايتىلدى.

سەرىك جۇمانعارين قۇزىرەتتى ورگاندارعا ءبىر اپتا ىشىندە قابىلداۋدا كوتەرىلگەن بارلىق ماسەلەنى ەگجەي-تەگجەيلى قاراستىرىپ، ناتيجەسى تۋرالى حابارلاۋدى تاپسىردى.

سوڭعى جاڭالىقتار