كورەي سالاتتارىنىڭ پايداسى مەن زيانى

استانا. قازاقپارات - قازىر كورەي سالاتتارىن كەز كەلگەن جاقىن ماڭداعى دۇكەننەن ساتىپ الۋعا بولادى.

اسىرەسە، كورەيشە دايىندالعان ءسابىز، مارينادتالعان ساڭىراۋقۇلاقتار، قاسقىرجەم (سپارجا) جانە كيمچيدى ءجيى كەزدەستىرۋگە بولادى. مۇنداي سالاتتاردىڭ پايداسى مەن زيانى قانداي؟ بۇل جايلى گاستروەنتەرولوگ سەرگەي لوپاتين Doctorpiter پورتالىنا ايتىپ بەردى.

كورەي سالاتتارىنىڭ پايداسى

كورەي سالاتتارى مەن تىسكەباسارلارىن تەرميالىق وڭدەۋسىز دايىندايدى. بۇل ونداعى پايدالى زاتتاردى، ياعني دارۋمەندەر مەن مينەرالداردى بارىنشا ساقتاۋعا كومەكتەسەدى. جالپى كورەي سالاتىنىڭ قۇرامىنا كىرەتىن ينگرەديەنتتەر دارۋمەندەرگە باي. مىسالى، سويالىق قاسقىرجەمنىڭ قۇرامىنا B توبىنىڭ، D جانە E دارۋمەندەرى كىرەدى.

ال كورەيشە دايىندالعان سابىزدە ا دارۋمەنىنىڭ مولشەرى جانە بەتا-كاروتين كوپ. كيمچيدى C دارۋمەنىنىڭ قوسىمشا كوزى رەتىندە پايدالانۋعا بولادى.

اسقورىتۋدى رەتتەيدى

كورەي سالاتتارى - وسىمدىك جاسۇنىعىنىڭ كەرەمەت كوزى. اسپازدىق تالشىقتار اسقازان-ىشەك جولدارىن تازالايدى، ىشەكتەر جيىرىلۋىن ىنتالاندىرادى جانە ءىش قاتۋدىڭ الدىن الادى. سونداي-اق جاسۇنىق توقتىق سەزىمىنىڭ جىلدام كەلۋىنە جانە ونى ۇزاققا ساقتاۋعا ىقپال ەتەدى.

قابىنۋعا قارسى اسەرگە يە

كورەي سالاتتارىنىڭ قۇرامىنا كوكونىستەردەن باسقا ءتۇرلى دامدەۋىشتەر قوسادى: اشى بۇرىش، سارىمساق، ءزىمبىر، كورياندر. ولاردىڭ اشىلىعىنا كاپسايتسين دەپ اتالاتىن زات جاۋاپ بەرەدى، ال ول انتيسەپتيكالىق اسەرگە يە. ول قاناينالىمدى ىنتالاندىرادى جانە تەر ءبولىنۋدى كۇشەيتەدى. سوندىقتان تۇماۋ اۋرۋلارى كەزىندە جانە جالپى اعزاداعى قابىنۋ پروتسەستەرى كەزىندە راتسيونعا اششى تاماقتار قوسقان پايدالى.

جۇرەك-قان تامىرلار جۇيەسىنىڭ ساۋلىعى

كورەي تىسكەباسارالارىنداعى دامدەۋىشتەردە كاليي بار: ول قان تامىرلار قابىرعالارى مەن قاناينالىمعا پايدالى.

ارتىق سالماقپەن كۇرەسۋ

كورەي سالاتتارىن زياندى مايونەز نەمەسە قايماقپەن ارالاستىرمايدى. ولاردىڭ كالورياسى تومەن. بۇل تاماق دەنە سىمباتتىلىعىنا زيان كەلتىرمەي راتسيوندى تۇرلەندىرۋگە كومەكتەسەدى. اششى تاماق زات الماسۋدىڭ جىلدامداۋىنا ىقپال ەتەدى.

انتيوكسيدانتتىق اسەر

كورەي سالاتتارىنىڭ ينگرەديەنتتەرى بيولوگيالىق بەلسەندى تابيعي قوسىلىستارعا باي. ولاردىڭ كەيبىرەۋلەرى انتيوكسيدانتتىق اسەرگە يە: ولار اعزا جاسۋشالارىن بوس راديكالدارمەن زاقىمداۋدان قورعايدى. سوندىقتان كورەيشە ءسابىز نەمەسە كيمچيدى جۇيەلى تۇردە جەۋ ءقاۋىپتى اۋرۋلار دامۋ قاۋپىن ازايتادى جانە تەرى جاستىعىن ساقتاۋعا ىقپال ەتەدى.

قارسى كورسەتىلىم

كورەي سالاتتارىنىڭ قۇرامىندا دامدەۋىشتەر مەن سىركە سۋى كوپ. بۇل ينگرەديەنتتەر اسقازان-ىشەك جولى اۋرۋلارىن اسقىندىرىپ جىبەرۋى مۇمكىن: گاستريت، جارا اۋرۋى، تىتىركەنگەن ىشەك سيندرومى. دامدەۋىشتەردىڭ كوپ بولۋى قىجىلدىڭ پايدا بولۋىنا اسەر ەتەدى. اشى تاماق اسقازان ءسولى ءبولىنۋىن ىنتالاندىرادى جانە ول ارتىق بولىپ كەتسە، ول وڭەشكە ءتۇسىپ، جاعىمسىز كۇيدىرىپ اۋىرتۋى مۇمكىن.

مۇنداي سالاتتاردى دايىنداعاندا تۇزدى دا كوپ قوسادى. ونىڭ قۇرامىنداعى ناتري ارتەريالىق قىسىمى جوعارى جانە جۇرەك جۇمىسىندا بۇزىلىس بار ادامدارعا قاۋىپتى.

سونداي-اق سالات ينگرەديەنتتەرى اللەرگيالىق رەاكسيا بەرۋى مۇمكىن ەكەنىن ەسكەرگەن ءجون.

كورەي سالاتتارىن قانشالىقتى ءجيى جەۋگە بولادى؟

ەگەر ادامدا اسقورىتۋمەن پروبلەما بولماسا، ول كورەي سالاتتارىن كۇندەلىكتى راتسيونىنا قوسۋىنا بولادى. الايدا ولاردىڭ قۇرامىندا تۇز كوپ بولعاندىقتان، كوپ جەۋدىڭ قاجەتى جوق: شامامەن 150-200 گرام پورتسيامەن شەكتەلگەن ءجون.

ەسكە سالايىق، قىجىل - اسقازان-ىشەك جولى اۋرۋلارى كەزىندە جانە كەي ونىمدەر مەن الكوگول، سونداي-اق ءدارى-دارمەكتەر ىشكەننەن كەيىن پايدا بولاتىن پروبلەما. قىجىل كەزىندە ءىشىڭىزدىڭ جوعارعى تۇسى جانە كەۋدە تۇسى كۇيىپ اۋىرادى، جۇرەگىڭىز اينۋى مۇمكىن، ىشىڭىزدەن اۋىرلىق سەزىنەسىز جانە قوزعالعاندا ول ودان سايىن اۋىرادى.