ۇلىتاۋلىق ۇستاز وقۋشىلارىمەن بىرگە «باگگي» كولىگىن قۇراستىردى

جەزقازعان. قازاقپارات - ۇلىتاۋ اۋدانى وقۋشىلار ءۇيىنىڭ «باستاپقى تەحنيكالىق مودەلدەۋ» ۇيىرمەسىنىڭ جەتەكشىسى قازبەك مۇقانوۆ وقۋشىلارىمەن بىرگە «باگگي» دەپ اتالاتىن سپورتتىق اۆتوكولىك قۇراستىردى، دەپ حابارلايدى قازاقپارات.

ساعاتىنا 50-60 شاقىرىم جىلدامدىقپەن جۇرەتىن جەر تالعامايتىن «باگگي» ءار تەحنيكا قۇرالدارىنان جينالعان. بۇرىلىس مەحانيزمى ۆاز-2109 ماشيناسىنان، دوڭگەلەكتەرى كۆادراتسيكل، ماتورى موتوتسيكلدەن الىنعان. دىبىس سينگالى، فارلارى بار كولىك تۋريستتەرگە تاپتىرمايتىن قوزعالىس قۇرالى. ۇيىرمە جەتەكشىسىنىڭ ايتۋىنشا، «باگگي» ۇلىتاۋ تاۋلارىن ارالاۋعا ىڭعايلى، جانارمايدى دا كوپ قاجەت ەپتەيدى.

«بۇعان دەيىن وقۋشىلار شاعىن مودەلدەرمەن اينالىسىپ، ماشينا، ۇشاق جاساپ ءجۇردى. بىلتىرعى وقۋ جىلىندا ۆەلوموبيل جاساپ، وقۋشىلارمەن بىرگە ماتورلى ماشينا قۇراستىرۋدى ويعا العان بولاتىنبىز. دانەكەرلەۋ جۇمىستارىن ءوزىم جاسادىم، وقۋشىلارىم تەمىرلان سەرىك، شەرحان قۋانىش جانە ەرسۇلتان بورانباي دەتالدارىن قۇراستىرىپ، بوياۋعا كومەكتەستى»، - دەيدى ۇيىرمە جەتەكشىسى قازبەك مۇقانوۆ.

ۇستاز بەن وقۋشىلار «باگگي» سپورتتىق كولىگىن 2 ايدا قۇراستىرىپ شىققان. ىقشام ءارى ىڭعايلى تەحنيكا كوپتىڭ قىزىعۋشىلىعىن تۋدىرىپ، «باستاپقى تەحنيكالىق مودەلدەۋ» ۇيىرمەسىنە جازىلۋعا نيەتتى ەر بالالار قاتارى ارتقان. ۇلىتاۋلىق ۇستاز شاكىرتتەرىن تەحنيكاعا باۋلىپ قانا قويماي، وسى ءىستى دامىتىپ ءوڭىر تۋريزمىنە دە ۇلەس قوسۋدى جوسپارلاپ وتىر.