سۋكۋك حالىقارالىق قارجى قۇرالى قازاقستان ءۇشىن نەسىمەن ۇتىمدى
ونىڭ ءمانى نەدە، نەسىمەن ۇتىمدى جانە قاي سالالارعا تارتىلادى؟ تولىعىراق يسلام ازىق-تۇلىك قاۋىپسىزدىگى ۇيىمىنىڭ باس ديرەكتورى ەرلان بايداۋلەت ايتىپ بەردى، دەپ حابارلايدى قازاقپارات ءتىلشىسى.
«يسلام ازىق-تۇلىك قاۋىپسىزدىگى ۇيىمى - اۋىل شارۋاشىلىعى جانە تاماق ونەركاسىبىن دامىتۋ ينستيتۋتى. ەگەر «سۋكۋك» حالىقارالىق يسلام قارجى قۇرالىن تارتۋ بويىنشا كەلىسىم جاسالسا، وندا اۋىل شارۋاشىلىعى سالاسى، لوگيستيكا، وزىندىك قۇنى بويىنشا جوبالار قولعا الىنادى. مەملەكەت باسشىسى ازىق- تۇلىك ەكسپورتىن دامىتۋ مىندەتىن قويىپ وتىر. بۇل باعىتتا ەكسپورت تاياۋ شىعىس، پارسى شىعاناعى ەلدەرىندە بەلسەندى دامىپ كەلەدى»، - دەدى ەرلان بايداۋلەت سىرتقى ىستەر مينيسترلىگىندە يسلام ازىق-تۇلىك قاۋىپسىزدىگى ۇيىمىنىڭ ۇيىتقى بولۋىمەن وتكەن سەمينار بارىسىندا.
ونىڭ ايتۋىنشا، اۋىل شارۋاشىلىعىنان بولەك «سۋكۋك» سەرتيفيكاتتارى ليزينگتىك جوبالاردى دامىتۋ باعىتىنا دا بەرىلەدى.
«بۇگىن اتالعان ماسەلەلەر تالقىلانىپ، حالىقارالىق تاجىريبە قارالىپ جاتىر. بۇگىنگى شارانىڭ ءبىر ەرەكشەلىگى - ينۆەستيتسيا جەرگىلىكتى ۆاليۋتامەن تارتىلادى. ءقازىر الەمدىك ەكونوميكالىق ترەند - ۇلتتىق ەكونوميكانى دامىتۋ. دوللارسىزداندىرۋ، ياعني ۇلتتىق ۆاليۋتا ارقىلى باعالى قاعازداردى تارتۋ قازىر بۇكىل الەمدە ءجۇرىپ جاتىر»، - دەيدى ول.
ايتا كەتسەك، «سۋكۋك» سەرتيفيكاتى - شاريعاتقا سايكەس كەلەتىن امبەباپ قارجى قۇرالى. ول - بەلگىلى ءبىر جوبانىڭ ماتەريالدىق اكتيۆتەرىندەگى، كورسەتىلەتىن قىزمەتتەرىندەگى، اكتيۆتەرىندەگى بولىنبەيتىن مەنشىك ۇلەسىن كۋالاندىراتىن تەڭ نومينالدى قۇن سەرتيفيكاتى.
