كورەيادا ونكولوگيالىق دەرتتى اۋىر يون كومەگىمەن ەمدەپ جاتىر

None
استانا. قازاقپارات - وڭتۇستىك كورەيادا العاش رەت ونكولوگيالىق اۋرۋلاردى اۋىر يونداردىڭ كومەگىمەن ەمدەي باستادى. بۇل ءادىس جاپونيادا شامامەن 30 جىل بۇرىن قولدانىلعان. باعاسى قىمبات بولعانىمەن ناتيجەسى جاقسى.

الەمدە يونوتەراپيا ورتالىعى بار 5 ەل بولسا، سونىڭ ءبىرى وڭتۇستىك كورەيا. ونىڭ قۇرىلىسىنا 300 ميلليارد ۆون نەمەسە شامامەن 234 ميلليون دوللار جۇمسالعان. جەتى قاباتتى عيماراتتىڭ جەر استىندا بەس بولىگى بار.

وسى اۋرۋحانادا الەمدە العاش رەت بيىكتىگى 3 قابات ەكى اينالمالى پورتال پايدا بولدى. بۇل مەحانيزمدەر كومىرتەگى اتومىن جارىق جىلدامدىعىنداي جەدەلدەتەدى. الىنعان قۋاتتى ەنەرگيا ساۋلەسى قاتەرلى ىسىك كلەتكالارىن ولتىرەدى.

لي يك دجە، يەنسە ۋنيۆەرسيتەتى اۋىر يوندارمەن ەمدەۋ ورتالىعىنىڭ ديرەكتورى:

- العاشىندا قاتەرلى ىسىك رەنتگەن ساۋلەلەرىمەن ەمدەلدى، كەيىن پروتون تەراپياسى پايدا بولدى، قازىر اۋىر يوندارمەن ەمدەپ جاتىرمىز. يوندىق جانە پروتوندىق تەراپيانىڭ ايىرماشىلىعى تۋرالى ايتاتىن بولساق، اۋىر يوندارمەن ەمدەۋ 2-3 ەسە تيىمدىرەك. ويتكەنى ساۋلەلەر كۇشتىرەك جانە ىسىككە ءدال تۇسەدى، جاقىن ورنالاسقان تەرى مەن جاسۋشالارعا زاقىم كەلتىرمەيدى.

جاڭا ورتالىق ەمدەلۋشىلەرگە كەتەتىن شىعىندى ازايتادى. بۇرىن كوپتەگەن وڭتۇستىك كورەيالىقتار يون تەراپياسىن الۋ ءۇشىن جاپونياعا باراتىن.

لي يك دجە، يەنسە ۋنيۆەرسيتەتى اۋىر يوندارمەن ەمدەۋ ورتالىعىنىڭ ديرەكتورى:

- بىزدە 3 كابينەت بار. ءبىرىنشى بولمەنى قۋىق استى بەزىنىڭ قاتەرلى ىسىگىن ەمدەۋگە پايدالانامىز. الداعى ۋاقىتتا ەكىنشى جانە ءۇشىنشى كابينەتتەردى وكپە، ۇيقى بەزى، مي ىسىگى جانە بۇرىن ەمدەلمەيتىن باسقا دا اۋرۋلارعا پايدالانۋدى جوسپارلاپ وتىرمىز. ءبىزدىڭ ماقساتىمىز - كورەيا حالقى ءۇشىن ەمدەلۋدى قولجەتىمدى ەتۋ. بولاشاقتا جابدىقتاردىڭ كولەمىن كىشىرەيتەتىن تەحنولوگيالار پايدا بولسا، ءارتۇرلى ونكولوگيالىق اۋرۋلاردى ەمدەۋگە بولادى.

اۋىر يوندار ەركەك بەزىنىڭ قابىنۋىن ەمدەۋگە ءتيىمدى. ءبىراق، وكىنىشكە قاراي، بۇل ءادىس اۋرۋدىڭ 4-ساتىسى بار ناۋقاستارعا كومەكتەسە المايدى. ءبىر ۇلكەن كەمشىلىك - يونوتەراپيانىڭ قۇنى قىمبات. وڭتۇستىك كورەيادا مۇنداي ەم مەديتسينالىق ساقتاندىرۋمەن قاراستىرىلماعان. سوندىقتان ناۋقاس شامامەن 41 مىڭ ا ق ش دوللارىن جۇمسايدى.

ۆلاديسلاۆ سوي، ولگا ليان

www.24.kz


سوڭعى جاڭالىقتار