بريتانيادا جۇمىس بار، الايدا جۇمىسشى جوق

استانا. قازاقپارات - ۇلى بريتانيادا جۇمىس كوپ، ءبىراق جۇمىس كۇشى جەتىسپەيدى. برەكسيت ەۋروپادان كەلەتىن ميگرانتتارعا توسقاۋىل قويىپ تاستاعالى ەڭبەك نارىعىنداعى جاعداي كۇردەلەنە ءتۇستى. كارانتيننەن كەيىن جۇمىسقا شىقپاي قويعان ەگدە جاستاعى كىسىلەر دە جىعىلعانعا جۇدىرىق بولىپ وتىر.

كادر تاپشىلىعىنا تاپ بولعان مەكەمەلەر جۇمىس كۇشىن تارتۋ ءۇشىن حالىقتى جوعارى جالاقىمەن قىزىقتىرۋعا ءماجبۇر. اسىرەسە حالىققا قىزمەت كورسەتۋ سالاسىندا مامان تاپشى.

ەل ەۋروپالىق وداق قۇرامىنان شىققاننان كەيىن ەڭبەك- ميگرانتتارى تۋعان جەرلەرىنە ورالعان. ال ەۋرووداق قۇرامىنا كىرمەيتىن مەملەكەتتەردەن كەلگەن جۇمىسشىلار ولاردىڭ ورنىن تولتىرا الماي وتىر. ەلدە بوس جۇمىس ورىندارى ميلليونان اسقاندىقتان جۇمىسشىلارعا دەگەن تالاس كۇشەيە ءتۇستى. جۇمىس بەرۋشىلەردىڭ جوعارى جالاقىمەن قىزىقتىرۋدان باسقا امالى قالماعانداي.

پيتەر نيل، كافە يەسى:

- ەگەر جاعداي بۇلاي جالعاسا بەرەتىن بولسا، بيزنەسىمىزدىڭ ساقتالۋى نەعايبىل. گاز بەن جارىقتىڭ باعاسى شامامەن 70 پروتسەنتكە ءوستى. جۇمىس كۇشىنە تولەنەتىن جالاقى ارتتى. ال باعالارىمىزدى 8 پروتسەنتكە عانا قىمباتتاتتىق. وسىلايشا كىرىسىمىز ازايدى.

كوكتەمدە ايلىق وتكەن جىلمەن سالىستىرعاندا 7,2 پروتسەنتكە ارتقان. بۇل وتە جوعارى كورسەتكىش. ءبىراق ءبارىبىر 8,7 پروتسەنتتى قۇرايتىن ينفلياتسيادان تومەن. دەمەك جالاقى كولەمى 2,8 پروتسەنتكە ءتۇسىپ كەتتى دەگەن ءسوز.

ەنتوني گرەيلينگ، ساراپشى:

- وپتيميزم تۇرعىسىنان الىپ قاراعاندا جالاقىنىڭ كوبەيۋى جۇمىسشىلار ءۇشىن جاقسى. ءبىراق بۇل ەكونوميكا ءۇشىن ءتيىمسىز. ياعني ينفلياتسيانىڭ شارىقتاۋىنا سەبەپشى بولادى. انگليا بانكى پروتسەنتتىك مولشەرلەمەنى تاعى كوتەرۋى مۇمكىن. بۇل ءوز كەزەگىندە نەسيەسى بارلاردى تىعىرىققا تىرەيدى.

كوروناۆيرۋستىڭ ەكىنشى تولقىنىنان كەيىن جۇمىس ىستەيتىن ەگدە جاستاعىلاردىڭ سانى ازايدى. ولاردىڭ كەيبىرى ۋاقىتىنان بۇرىن زەينەت دەمالىسىنا شىعىپ كەتتى. ۇزاق ناۋقاستانعان ادامداردىڭ سانى رەكوردتىق دەڭگەيگە جەتىپ، ەڭبەك نارىعىنىڭ اياسى تارىلدى. قارجى سالاسىنا جاۋاپتىلاردىڭ پىكىرىنشە، باعا ءالى دە وسەدى.

ەندريۋ بەيلي، انگليا بانكىنىڭ باسقارۋشىسى:

- مالىمەتتەرگە سايكەس، ەڭبەك نارىعىنداعى جاعداي قيىن بولىپ تۇر. بوس جۇمىس ورىندارىن ۇسىنۋشىلار ازايىپ كەلەدى، ءبىراق بۇل وتە باياۋ قارقىن الۋدا. ينفلياتسيا دەڭگەيىنىڭ تومەندەيتىندىگىنە سەنىمدىمىز. ءبىراق ءبىز بولجاعانداي ەمەس، بۇعان كوپتەۋ ۋاقىت كەتەيىن دەپ تۇر.

ەڭبەك نارىعىنداعى كۇردەلى جاعداي ينفلياتسياعا كەرى اسەرىن تيگىزىپ، ەكونوميكالىق ءوسىمدى شەكتەۋى مۇمكىن. كەيبىر مەملەكەتتىك قارىزداردىڭ دا كولەمى ارتپاق. ەلدە ءومىر ءسۇرۋ قۇنى قىمباتتاعاندىقتان كەزىندە برەكسيتتى قولداعاندار رايىنان قايتىپ جاتىر. بۇعان ساۋالنامالاردىڭ قورىتىندىلارى دالەل.

عالىمجان قارامان ۇلى

www.24.kz