ءماجىلىس سەمەي يادرولىق قاۋىپسىزدىك ايماعىنا قاتىستى قۇجاتتى قابىلدادى

None
استانا. قازاقپارات - بۇگىن ءماجىلىستىڭ جالپى وتىرىسىندا «سەمەي يادرولىق قاۋىپسىزدىك ايماعى تۋرالى» زاڭ جوباسى مەن ىلەسپە قۇجات ەكىنشى وقىلىمدا تالقىلانىپ، قابىلداندى، دەپ حابارلايدى قازاقپارات ءتىلشىسى.

اتالعان زاڭىنىڭ جوباسىن پارلامەنت ءماجىلىسى 2022-جىلعى 13- ساۋىردە ءبىرىنشى وقىلىمدا ماقۇلدادى.

«زاڭ جوباسى رادياتسيالىق جانە ەكولوگيالىق قاۋىپسىزدىكتىڭ ءتيىستى دەڭگەيىن قامتاماسىز ەتۋ، بۇرىنعى يادرولىق پوليگوننىڭ جەرلەرىن پايدالانۋ جانە ونىڭ اۋماعىن وڭالتۋ ماسەلەلەرىندە مەملەكەتتىك باقىلاۋدى كۇشەيتۋ ماقساتىندا سەمەي يادرولىق قاۋىپسىزدىك ايماعى جەرلەرىن قۇرۋدى كوزدەيدى. دەپۋتاتتار زاڭ جوباسىن ەكىنشى وقىلىمعا ازىرلەۋ بارىسىندا كەشەندى ەكولوگيالىق زەرتتەپ-قاراۋدى جۇرگىزۋ كەزىندە راديوەكولوگيالىق جاعدايعا ساپالى ءارى دايەكتى تالداۋدى قامتاماسىز ەتۋ قاۋىپسىزدىگى قاعيداتىن قامتيتىن سەمەي يادرولىق قاۋىپسىزدىك ايماعى قىزمەتىن زاڭنامالىق رەتتەۋ قاعيداتتارىن بەلگىلەۋگە باعىتتالعان تۇزەتۋلەردى ەنگىزدى. ەكىنشىدەن، مەملەكەتتىك ورگانداردىڭ سەمەي يادرولىق قاۋىپسىزدىك ايماعىن قۇرۋ جانە ونىڭ جۇمىس ىستەۋى سالاسىنداعى قۇزىرەتى ناقتىلاندى. ۇشىنشىدەن، ۋاكىلەتتى ورگاننىڭ سەمەي يادرولىق قاۋىپسىزدىك ايماعىنىڭ پاسپورتىن تىركەۋگە ارنالعان قۇزىرەتىن ناقتىلاۋعا، يادرولىق قارۋدى سىناۋ جۇرگىزىلگەن جەر ۋچاسكەلەرىنە كەشەندى ەكولوگيالىق زەرتتەپ- قاراۋ جۇرگىزۋ ادىستەمەسىن ازىرلەۋ مەن بەكىتۋگە ارنالعان تۇزەتۋ قامتىلدى»، - دەدى ءماجىلىس دەپۋتاتى ەدىل جاڭبىرشين.

دەپۋتاتتار ىلەسپە زاڭ جوباسىمەن جۇمىس بارىسىندا:

- زاپاستاعى جەرلەردى يادرولىق قاۋىپسىزدىك ايماعىنىڭ جەرلەرىنە اۋىستىرۋ ءتارتىبىن ناقتىلاۋعا؛

- يادرولىق قاۋىپسىزدىك ايماعى جەرلەرىندە جەر پايدالانۋ قۇقىعىنا قاتىستى مامىلەلەر جاساسۋعا تىيىم سالۋدى بەلگىلەۋگە باعىتتالعان تۇزەتۋلەردى ەنگىزدى.

«زاڭ جوباسىن قاراۋ بارىسىندا سالىق، جەر جانە ەكولوگيالىق زاڭناماعا سايكەس ارنايى قۇقىقتىق رەجيمدى بەلگىلەۋ ماقساتىمەن دەپۋتاتتار «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» كودەكسكە (سالىق كودەكسى) ءتيىستى تۇزەتۋلەر ەنگىزدى. جۇمىس توبىنىڭ وتىرىستارىندا تالقىلاۋ بارىسىندا زاڭ جوباسى نورمالارىنىڭ ءبىر بولىگى ناقتىلانىپ، رەداكتسيالىق تۇرعىدان جاقسارتىلدى، زاڭ جوباسىنىڭ ءماتىنى زاڭ تەحنيكاسىنىڭ قاعيدالارى مەن نورما شىعارماشىلىق پراكتيكاسىنا سايكەس كەلتىرىلدى»، - دەدى دەپۋتات.

سوڭعى جاڭالىقتار