جالاڭاياق ءجۇرۋدىڭ بەس پايداسى

استانا. قازاقپارات - ادامدار جۇمىستا، دالادا سەرۋەندەگەندە جانە سپورتپەن اينالىسقاندا اياقكيىممەن جۇرەدى.

كەي ادامدار ءۇيدىڭ ىشىندە دە تاپىشكە كيىپ جۇرەدى. الايدا جالاڭاياق ءجۇرۋدىڭ دەنساۋلىققا پايداسى كوپ، - دەپ حابارلايدى Massaget.kz ءتىلشىسى Heroine پورتالىنا سىلتەمە جاساپ.

قان اينالىمدى جاقسارتادى

دەنساۋلىقتى قاتايتۋ ءۇشىن جەردە جانە شوپتە جالاڭاياق ءجۇرۋ كەرەك. مۇنداي شەشىمگە 2015 -جىلى ا ق ش عالىمدارى كەلدى. ولاردىڭ زەرتتەۋى جالاڭاياق سەرۋەندەۋ قان اينالىمدى جاقسارتۋعا ىقپال ەتەتىنىن جانە قابىنۋدى ازايتىپ، اۋىرسىنۋدى جەڭىلدەتەتىنىن دالەلدەگەن. عالىمداردىڭ ايتۋىنشا، دەنە جەرمەن بايلانىسقان كەزدە بوس ەلەكتروندار ونىڭ بەتىنەن اعزاعا تۇسەدى، بۇل جەردە ولار انتيوكسيدانتتىق اسەر بەرەدى.

ۇيقى ساپاسىن جاقسارتادى

امەريكالىق عالىم دجەيمس ولشمان 2007 -جىلى ءشوپتىڭ ۇستىمەن جالاڭاياق ءجۇرۋ ۇيقى ساپاسىن جاقسارتاتىنىن كورسەتەتىن زەرتتەۋ جۇرگىزدى. سونداي-اق جەردىڭ جانە قۇمنىڭ ۇستىمەن ءجۇرۋ دە پايدالى. عالىم جاياۋ ءجۇرۋ اعزاداعى كورتيزول دەڭگەيىن رەتتەۋگە كومەكتەسەتىنىن انىقتادى. جالاڭاياق جۇرگەن ادام كۇيزەلىسپەن جاقسىراق كۇرەسەدى، ال بۇل ۇيقىسىزدىقتان ارىلۋعا كومەكتەسەدى.

تابان بۇلشىقەتتەرى جۇمىسىن ىنتالاندىرادى

ورتوپەد انا كاربو ءۇيدىڭ ىشىندە ءجيى جالاڭاياق جۇرۋگە كەڭەس بەرەدى. بۇل ادەت بۇلشىقەتتەر جۇمىسىن ىنتالاندىرادى. ۇنەمى اياقكيىم كيۋ تابان بۇلشىقەتتەرىن ءالسىز ەتىپ، وزگەرىسكە ۇشىراتادى. اسىرەسە مايتابان، تابان اۋىرۋى سەكىلدى اياق پروبلەماسى بار ادامدار ءجيى جالاڭاياق ءجۇرۋ كەرەك.

تاباندا سەزىمتال جۇيكە ۇشتارى وتە كوپ. قانشالىقتى ءجيى جالاڭاياق جۇرسەڭىز، جۇيكە ۇشتارىن سونشالىقتى ءجيى ىسكە قوساسىز. بۇل جالپى اعزانىڭ جاعدايىن جاقسارتۋعا جانە اياقتاعى اۋىرسىنۋدان ارىلۋعا كومەكتەسەدى.

تەرىنى قابىرشاقتاندىرۋعا كومەكتەسەدى

ا ق ش دەرماتولوگى يسااك ەليازدىڭ ايتۋىنشا، قۇمنىڭ ۇستىندە جالاڭاياق ءجۇرۋ پيلينگ- پروتسەدۋرا رەتىندە اسەر ەتەدى. ول تابان تەرىسىنە جۇمساق ماسساج جاساپ، تەرىنىڭ ولگەن جاسۋشالارىنىڭ الىنۋىنا كومەكتەسەدى.

پسيحيكالىق دەنساۋلىقتى جاقسارتۋعا كومەكتەسەدى

ا ق ش دارىگەرى ساندي شۆارتس جەردە ءجيى جالاڭاياق سەرۋەندەۋگە جانە باعبانشىلىقپەن اينالىسۋعا كەڭەس بەرەدى. توپىراقتا Mycobacterium vaccae باكتەرياسى بار. ونىمەن بايلانىس كەزىندە سەروتونين بولىنۋىنە اسەر ەتەتىن جاسۋشالار ىسكە قوسىلادى. بۇل گورمون كوڭىل كۇيدى جاقسارتۋعا جانە كەي پسيحيكالىق اۋرۋلاردىڭ پايدا بولۋ قاۋپىن تومەندەتۋگە قاجەت.