قالامساپ ىشىندەگى شپارگالكا، كوستيۋم استارىنا جاسىرىلعان سمارتفون: بيىلعى ۇ ب ت- دا قانداي زاڭسىزدىقتار

استانا. قازاقپارات - ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ ۇ ب ت تاپسىرۋشىلارعا ۇندەۋ تاستادى، دەپ حابارلايدى قازاقپارات ءتىلشىسى.

«ستاتيستيكا بويىنشا جىل سايىن ۇ ب ت- داعى ەرەجە بۇزۋشىلاردىڭ سانى ازايىپ كەلە جاتىر. ماسەلەن، 2019 -جىلى تەستىلەۋگە كىرگىزۋ بارىسىندا 128 مىڭ، 2020 -جىلى – 2522، 2021 -جىلى – 756، 2022 -جىلى - 327 تىيىم سالىنعان زات انىقتالدى. ياعني، كورسەتكىش 400 ەسە ازايعان. بۇل تالاپكەرلەردىڭ بۇگىندە ءوز بىلىمدەرىنە سەنىپ، اكادەميالىق ادالدىق ەرەجەلەرىمەن جاقسى تانىس ەكەنىن كورسەتەدى»، - دەپ جازدى ول Instagram پاراقشاسىندا.

سونداي-اق، ول «شپارگالكا» پايدالانۋشىلار سانى ازايعانىمەن، مۇلدەم جويىلىپ كەتپەگەنىن ايتادى.

«بيىلعى ۇ ب ت- نىڭ 5 اپتاسى بويىنشا انىقتالعان ەڭ كرەاتيۆتى «تاسىلدەردى» وسى جازبادا ۇسىنىپ وتىرمىن. تالاپكەرلەردىڭ، وكىنىشىنە قاراي، ءبىزدىڭ قىراعى باقىلاۋشىلاردى الداۋى مۇمكىن بولمادى. بالالاردىڭ ەرەكشە شىعارماشىلىق جۇمىستارى بىردەن انىقتالدى. تەستىلەۋ ەرەجەلەرىن بۇزۋ تۋرالى بىزگە كەلىپ تۇسكەن ءاربىر ءوتىنىش قاراستىرىلادى. ەستەرىڭىزدە بولسا، بىلتىر پوستمونيتورينگ قورىتىندىسى بويىنشا 200-دەن استام ادامنىڭ تەست ناتيجەسىن جويدىق. ونىڭ ىشىندە 137 ى گرانت يەگەرى بولعان. بيىل دا بۇل جۇمىس ءوز جالعاسىن تابادى.

بيىلعى ۇ ب ت- نىڭ اياقتالۋىنا 2 اپتا قالدى. تالاپكەرلەردى اكادەميالىق ادالدىق پرينتسيپتەرىن ساقتاۋعا شاقىرامىن. جەتىستىككە جەتۋدىڭ باستى شارتى ءبىلىمدى بولۋ ەكەنىن ۇمىتپاڭىزدار»، - دەدى رۋسلان ەمەلبايەۆ.