وسكەمەندە قازاقستان- گەرمانيا عىلىم جانە تەحنولوگيا ينستيتۋتى اشىلادى
ق ر پرەزيدەنتى قاسىم- جومارت توقايەۆ پەن گەرمانيا پرەزيدەنتى فرانك- ۆالتەر شتاينمايەردىڭ قاتىسۋىمەن وتكەن قازاقستان- نەمىس ۋنيۆەرسيتەتتەرى رەكتورلارىنىڭ فورۋمى اياسىندا د. سەرىكبايەۆ اتىنداعى شىعىس قازاقستان تەحنيكالىق ۋنيۆەرسيتەتى جانە قازاقستان- گەرمانيا ۋنيۆەرسيتەتى مەتاللۋرگيا جانە تاۋ- كەن ءىسى سالاسىندا عىلىم جانە تەحنولوگيا ينستيتۋتىن اشۋ تۋرالى نەگىزدەمەلىك كەلىسىمگە قول قويدى.
كەلىسىم بويىنشا مەتاللۋرگيا جانە پايدالى قازبالاردى ءوندىرۋ سالاسىنداعى عىلىم جانە تەحنولوگيالار ينستيتۋتى قۇرىلىپ، ينجەنەريا سالاسىنداعى ۇزدىك نەمىس تاجىريبەسى ەلىمىزدە قولعا الىنادى. جوبا ماقساتى - ەلىمىزدىڭ شىعىس ءوڭىرىن وركەندەتۋ، ءال- اۋقاتىن جانە ورنىقتى دامۋىن جۇزەگە اسىرۋ ءۇشىن زەرتتەۋلەر، ءبىلىم جانە يننوۆاتسيا «ءبىلىم ۇشتىگىنە» نەگىزدەلگەن پلاتفورما قۇرۋ.
«عىلىم جانە جوعارى ءبىلىم سالاسىنداعى ساياسات ءبىلىم مەن عىلىمدى ينتەرناتسيونالداندىرۋدى كەڭەيتۋگە، تۇراقتى جانە ءتيىمدى بايلانىستاردى قالىپتاستىرۋعا باعىتتالعان. ىنتىماقتاستىق نەگىزى ءۇش ءتۇرلى باعىتتا جۇرگىزىلەدى. ءبىرىنشىسى، ءبىلىم بەرۋ. بۇل مەتاللۋرگيا، ماشينا جاساۋ، گەولوگيا جانە تاۋ- كەن ءىسى، پايدالى قازبالاردى بايىتۋ، تۇراقتى دامۋ باعىتتارى بويىنشا ەكى ديپلومدى جانە بىرلەسكەن كادرلار دايارلاۋ. ەكىنشى باعىت - مەتاللۋرگيا جانە ماتەريالتانۋ، گەودەزيا، گەولوگيا جانە تاۋ- كەن ءىسى، تۇراقتى دامۋ سالاسىنداعى بىرلەسكەن زەرتتەۋلەر. ءۇشىنشى باعىت - يننوۆاتسيالار، عىلىم مەن ءوندىرىستىڭ يننوۆاتسيالىق كلاستەرىن، بىرلەسكەن عىلىمي جانە ستارتاپ جوبالاردى ىسكە قوسۋ»، - دەدى د. سەرىكبايەۆ اتىنداعى شقتۋ باسقارما ءتوراعاسى- رەكتور ساۋلە راحمەتۋللينا.
مەتاللۋرگيا جانە پايدالى قازبالاردى ءوندىرۋ سالاسىنداعى ينستيتۋتتىڭ قۇرىلۋى ەل عىلىمىن جانە تەحنولوگيالارىن دامىتۋداعى، سونداي- اق ەكى ەل اراسىنداعى دوستىق قاتىناستاردى نىعايتۋداعى ماڭىزدى قادام بولىپ وتىر.
