شىمكەنتتە قارتتار ءۇيى اشىلدى
شىمكەنت قالالىق جۇمىسپەن قامتۋ جانە الەۋمەتتىك قورعاۋ باسقارماسىنا قاراستى قارتتار ءۇيى ءوز جۇمىسىن باستادى. جاڭادان اشىلعان №10-ارناۋلى الەۋمەتتىك قىزمەتتەر كورسەتۋ ورتالىعىنان 30 عا جۋىق قاريا پانا تاپقان. ونىڭ ىشىندە بەسەۋى ەرەكشە كۇتىمدى قاجەت ەتەتىن مۇگەدەكتىگى بار تۇرعىن.
50 ادامعا ارنالعان تولىق ستاتسيونارلى مەكەمەدە قاريالاردىڭ ءومىر ءسۇرۋ ساپاسىن جاقسارتۋعا باعىتتالعان تۇرمىستىق، مەديتسينالىق، پسيحولوگيالىق، ەكونوميكالىق، قۇقىقتىق، مادەني جانە ەڭبەك تەراپياسى بويىنشا الەۋمەتتىك قىزمەت تۇرلەرى كورسەتىلەدى.
«ءبىز ءۇشىن بۇل جاۋاپكەرشىلىگى مول ورتالىقتىڭ ءبىرى بولماق. تاعدىر تاۋقىمەتىن تارتقان قاريالارىمىزعا ەرەكشە مەيىرىمدىلىك جانە قامقورلىقپەن قىزمەت كورسەتۋ - مىندەتىمىز. الەۋمەتتىك سالانىڭ قىزمەتىن جۇرەكپەن قابىلداۋ كەرەك. قاريالارىمىزدىڭ جاعدايى ۇنەمى باسقارمانىڭ نازارىندا بولادى»، - دەپ جازدى باسقارما باسشىسى.
ايتا كەتەيىك، شىمكەنت قالاسىنىڭ اۋماعىندا ورنالاسقان قارتتار ءۇيى كەزىندە تۇركىستان وبلىسىنىڭ بالانسىندا قالعان بولاتىن.
