21:40, 20 - ماۋسىم 2023 | GMT +6
سەمەي ورمانىنداعى ءورت: يۋري يلين كۋاگەر رەتىندە تەرگەلىپ جاتىر
استانا. قازاقپارات - باس پروكۋرور بەرىك اسىلوۆ بۇرىنعى توتەنشە جاعداي ءمينيسترى يۋري يليننىڭ اباي وبلىسىنداعى ورمان ورتىنە قاتىستى تەرگەۋگە تارتىلعانىن ايتتى، دەپ حابارلايدى قازاقپارات ءتىلشىسى.
«باس پروكۋراتۋرا جۇرگىزىپ جاتقان تەرگەۋ ىسىندە يۋري يلين مىرزانىڭ (قۇقىقتىق - رەد.) مارتەبەسى قانداي؟»، - دەپ سۇرادى جۋرناليست پارلامەنت پالاتالارىنىڭ بىرلەسكەن وتىرىسىنىڭ كۋلۋارىندا.
بەرىك اسىلوۆتىڭ ايتۋىنشا، اتالمىش تەرگەۋدە ەكس-مينيستر يۋري يليننىڭ مارتەبەسى ايقىندالماعان.
«جاي عانا كۋاگەر رەتىندە تەرگەدى، بولدى. ياعني، ونىڭ ەشقانداي مارتەبەسى جوق - كۋاگەر رەتىندە عانا تەرگەلدى. قازىر تەرگەۋ ءجۇرىپ جاتىر»، - دەدى باس پروكۋرور.
ەسكە سالا كەتەيىك، سەمەي ورمانىنداعى الاپات ورتكە قاتىستى قىلمىستىق كودەكستىڭ 292-بابى 3-بولىگى بويىنشا ءىس قوزعالعان.
