اۆتوكولىك الۋعا جەڭىلدەتىلگەن نەسيە بەرۋ باعدارلاماسى نە سەبەپتى اۆتوبۋس پاركىن جاڭارتۋعا باعىتتالماق

استانا. قازاقپارات - ءبىرىنشى ىسكە قوسىلعان اۆتوكولىك الۋعا نەسيە ءبولۋ باعدارلاماسى جالعاسادى، ال ەكىنشى باعدارلاما قاراجاتى اۆتوبۋس پاركىن جاڭارتۋعا باعىتتالادى.

بۇل تۋرالى يندۋستريا جانە ينفراقۇرىلىمدىق دامۋ ۆيتسە-ءمينيسترى ءىلياس وسپانوۆ ايتتى، دەپ حابارلايدى قازاقپارات ءتىلشىسى.

ۆيتسە-مينيستر ءبىراز جىل بۇرىن قازاقستاننىڭ دامۋ بانكى باستاعان اۆتوكرەديت باعدارلاماسى ارى قاراي جالعاساتىنىن ايتتى.

«بىزدە ەكى باعدارلاما بار ەكەنىن بىلەسىزدەر. بىرەۋى قازاقستاننىڭ دامۋ بانكى ارقىلى يگەرىلسە، ەكىنشىسى ونەركاسىپتى دامىتۋ قورى (و ك م قاراجاتى ەسەبىنەن) باعىتىندا ىسكە اسىرىلىپ جاتىر. ەندى ونەركاسىپتى دامىتۋ قورى ارقىلى ىسكە اسىرىلىپ جاتقان باعدارلاماعا وزگەرىس ەنگىزىلمەك. قاراجات وڭىرلەردەگى اۆتوبۋس پاركىن جاڭارتۋعا باعىتتالادى. ال قازاقستاننىڭ دامۋ بانكى اياسىنداعى باعدارلاما وزگەرىسسىز قالادى»، - دەدى ءىلياس وسپانوۆ ەلوردادا وتكەن باسپا ءسوز ءماسليحاتىندا.

وسى ورايدا ول اتالعان قور ارقىلى ىسكە اسىرىلىپ جاتقان باعدارلاما قاراجاتى نە سەبەپتى اۆتوبۋس الۋعا باعىتتالاتىنىن ءتۇسىندىردى.

«2022-جىلى مامىر ايىندا «و ك م وپەراتورى» قاراجاتى اياسىندا 100 ميلليارد تەڭگە كولىك الۋعا جەڭىلدەتىلگەن نەسيە رەتىندە ءبولىندى. قازىرگى كەزدە بۇل قاراجات تولىعىمەن يگەرىلدى. نەسيەنىڭ ورتاشا قۇنى 7 ميلليون تەڭگە شاماسىندا بولدى. بيىلدان باستاپ باعدارلامانى جەتىلدىرۋ جۇمىستارىن باستادىق. ءتۇرلى نۇسقالار پىسىقتالدى. ريەۆولۆەرلىك تارتىپتە جينالعان قاراجاتتى ەلەكتروندى پورتال ارقىلى باعدارلاماعا قاتىسقاندار اراسىندا بولدىك. اتاپ ايتقاندا، ەلىمىزدە اۆتوكولىك الۋعا نەسيە بولۋدەن بولەك، باسقا دا سالالارعا قاراجات باعىتتاۋ ماسەلەسى بولدى. ياعني ارناۋلى تەحنيكا، اۋىل شارۋاشىلىعى تەحنيكاسىن، سونداي-اق اۆتوبۋس الۋ باعىتىنداعى پروبلەمالار كوتەرىلدى. مينيسترلىك وكىلدەرى وڭىرلەرگە ساپارلاعان كەزدە، تۇرعىندار اۆتوبۋستاردىڭ تاپشىلىعى جايىندا ءجيى ايتىپ ءجۇر»، - دەدى ءى. وسپانوۆ.

ونىڭ ايتۋىنشا، ەلىمىزدە 10525 اۆتوبۋس بولسا، سولاردىڭ توزۋى دەڭگەيى شامامەن 46 پايىزعا جەتكەن.

«بۇل تۇرعىدا اۆتوبۋستاردىڭ جارتىسى ءتيىستى تالاپتارعا سايكەس كەلمەيتىنى بايقالىپ وتىر. اتاپ ايتقاندا، و ك م قاراجاتىن اۆتوبۋسقا باعىتتاۋ ۇسىنىسى پىسىقتالىپ جاتىر. وسى ورايدا اكىمدىكتەرمەن تالقىلاۋلار جۇرگىزدىك. اكىمدىكتەر 2 مىڭ اۆتوبۋس الۋعا ءوتىنىم ءبىلدىردى. ەلىمىزدە كۇنىنە 9,2 ميلليون ادام اۆتوبۋسپەن جۇرەدى. سوندىقتان وسى سالاعا باسىمدىق بەرىلىپ وتىر»، - دەدى ۆيتسە-مينيستر.

ونىڭ سوزىنە قاراعاندا، ەلىمىزدە اۆتوبۋس شىعاراتىن 6 ءوندىرىس بار.

سونىمەن قاتار «ونەركاسىپتى دامىتۋ قورى» ا ق جەكە ادامدارعا جەڭىلدەتىلگەن نەسيە بەرۋ باعدارلاماسىنا ارنالعان قاراجاتتىڭ نىسانالى ماقساتىن وزگەرتۋ جوسپارلانىپ وتىرعانىن حابارلادى. وعان سايكەس اينالىم قاراجاتى وتاندىق اۆتوبۋستاردى ليزينگتىك قارجىلاندىرۋعا قايتا بولىنەدى.

«اۆتوكولىك الۋعا جەڭىلدەتىلگەن نەسيە بەرۋ باعدارلاماسى ىسكە قوسىلعالى بەرى 13335 ادام كولىگىن الدى. دەگەنمەن، قازىرگى كەزدە اۆتوبۋستارعا قاتىستى سۇرانىس ارتىپ كەلەدى»، - دەلىنگەن ونەركاسىپتى دامىتۋ قورى مالىمەتىندە.

بۇدان بۇرىن حابارلانعانداي، يندۋستريا جانە ينفراقۇرىلىمدىق دامۋ ءمينيسترى مارات قارابايەۆ جەڭىلدەتىلگەن اۆتونەسيە باعدارلاماسى اياسىندا جولاۋشىلار اۆتوبۋسى ساتىپ الىناتىنىن ايتتى.

بىلتىر وكم وپەراتورىنىڭ قاراجاتى اۆتونەسيە مەن الەۋمەتتىك جوبالارعا جىبەرىلگەن ەدى.