اۋىل شارۋاشىلىعى ءمينيسترى قانت يمپورتىن ازايتۋعا قاتىستى پىكىر ءبىلدىردى
بۇل تۋرالى ماجىلىستە ءوتىپ جاتقان ۇكىمەت ساعاتىندا اۋىل شارۋاشىلىعى ءمينيسترى ەربول قاراشوكەيەۆ ايتتى، دەپ حابارلايدى قازاقپارات ءتىلشىسى.
«قانت قىزىلشاسىنىڭ ورتاشا جالپى ءونىمى 5 جىل ىشىندە (2017-2021 ج.) 450 مىڭ توننانى قۇرادى، ورتاشا ونىمدىلىگى 300 ت س/گ ا بولدى. باسقا ءوزىن-ءوزى قامتاماسىز ەتەتىن مەملەكەتتەردە ونىمدىلىك 440-480 ت س/گ ا قۇراپ وتىر (رەسەيدە - 437 ت س/گ ا، بەلارۋستە - 485 ت س/گ ا، ۋكراينادا-445 ت س/گ ا). ياعني ەلىمىزدەگى ونىمدىلىك دەڭگەيى تومەندەۋ»، - دەدى ە. قاراشوكەيەۆ.
ونىڭ ايتۋىنشا، قانت قىزىلشاسى ەگىستىكتەرىن ۇلعايتۋعا بۇل سالاداعى جوعارى شىعىندار مەن ءوندىرىستىڭ تومەن رەنتابەلدىگى، سونداي-اق سۋمەن قامتاماسىز ەتۋ قيىندىقتارى كەدەرگى بولىپ تۇر.
«مەملەكەت باسشىسىنىڭ تاپسىرماسىنا سايكەس، قانت قىزىلشاسىنىڭ ەگىس الاڭدارىن كەڭەيتۋدى، جاڭا سۋارمالى جەرلەردى ەنگىزۋدى، سۋ ۇنەمدەيتىن تەحنولوگيالارىن ىسكە قوسۋدى، تۇقىم شارۋاشىلىعىن دامىتۋدى، سونداي-اق جاڭا يننوۆاتسيالىق زاۋىت سالۋدى قامتيتىن 2026-جىلعا دەيىن قانت سالاسىن دامىتۋ جونىندەگى كەشەندى جوسپار ازىرلەنىپ، بەكىتىلدى. ورتا مەرزىمدى پەرسپەكتيۆادا جەرگىلىكتى قىزىلشادان قانتتىڭ ىشكى قاجەت كولەمىن 43 پايىزعا قامتاماسىز ەتۋ ءۇشىن ەگىس الاڭى وڭتۇستىك وڭىرلەردە ۇلعايادى. وتاندىق شيكىزاتتان قانت ءوندىرۋ 250 مىڭ تونناعا دەيىن وسەدى، سونداي-اق اق قانت يمپورتىنىڭ ۇلەسى 58 پايىزدان 17 پايىزعا دەيىن تومەندەتىلەدى»، - دەدى مينيستر.
ونىڭ سوزىنە قاراعاندا، فەرمەرلەردى قولداۋ جانە ولار ءۇشىن قانتتى ءوندىرۋدىڭ تيىمدىلىگىن ارتتىرۋ ماقساتىندا بيىل قانت قىزىلشاسىن ساتىپ الۋ باعاسى، سونداي-اق سۋبسيديا مولشەرى ارتتى. ماسەلەن، قانت زاۋىتتارى تونناسىنا 15 مىڭ تەڭگە، ال مەملەكەت 25 مىڭ تەڭگە سۋبسيديا تولەيدى. بۇدان باسقا، مەملەكەتتىك قولداۋ شارالارىن جەتىلدىرۋ جونىندەگى جۇمىس اياسىندا قىزىلشا جينايتىن كومبايندار مەن باسقا دا تەحنيكانى ساتىپ الۋعا وتەماقى ءنورماتيۆىن 50 پايىزعا دەيىن ارتتىرۋ ماسەلەسى پىسىقتالىپ جاتىر.
بۇدان بۇرىن حابارلانعانداي، قازاقستاندا قانتتى جۇگەرى مەن ءبيدايدان ءوندىرۋ ۇسىنىلدى.
