جۇسىپبەك ايماۋىتوۆتىڭ «تەز ولمەن» ولەڭى عالىمداردىڭ قولىنا قالاي ءتۇستى

استانا. قازاقپارات – ق ر مەملەكەتتىك كەڭەسشىسى ەرلان قارين جۇسىپبەك ايماۋىتوۆتىڭ «تەز ولمەن» ولەڭىنىڭ عالىمداردىڭ قولىنا قالاي تۇسكەنىن ايتىپ بەردى، دەپ حابارلايدى قازاقپارات.

«مەملەكەت باسشىسى قاسىم- جومارت توقايەۆ تۇركىستان قالاسىندا وتكەن ۇلتتىق قۇرىلتايدا ساياسي قۋعىن- سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا عالىمدارىنىڭ قۇپيا قۇجاتتاردى زەرتتەۋ كەزىندە جۇسىپبەك ايماۋىتوۆ جازعان دەلىنگەن شىعارمانىڭ تابىلعانىن ايتقان بولاتىن.

ەندى جۇسىپبەك ايماۋىتوۆقا تەلىنىپ وتىرعان «تەز ولمەن» ولەڭىنىڭ عالىمداردىڭ قولىنا قالاي تۇسكەنى جايىندا از- كەم باياندايىق»، - دەپ جازدى ەرلان قارين facebook-تەگى پاراقشاسىندا.

ونىڭ ايتۋىنشا، ارحيۆ قۇجاتتارىندا بۇل تۋىندىنى جۇسىپبەك ايماۋىت ۇلى اباقتىدا تەرگەۋدە جاتقان كەزىندە جازعان دەپ كورسەتىلەدى. ول ق ر ىشكى ىستەر مينيسترلىگىنە قاراستى قاراعاندى قالالىق پوليتسيا دەپارتامەنتىنىڭ ارنايى مەملەكەتتىك ارحيۆ قورىنداعى № 01093 ىسىندە ساقتالعان. بۇل ءىس جانە باسقا دا كوپتەگەن قۇجاتتار جاقىندا مەملەكەتتىك كوميسسيا اياسىندا قۇپياسىزداندىرىلعان ەدى.

شىعارما توتە جازۋمەن جازىلعان. سونىمەن قاتار، ورىس تىلىندەگى قىسقاشا تۇسىندىرمەسى دە بار.

«تۋىندى تۋرالى قاراعاندى وبلىستىق وگپۋ باسقارماسىنا قاراستى ارنايى ءبولىمىنىڭ باسشىسى ل. ۆ. كرۋچينين جاساعان تەرگەۋ حاتتاماسىندا دا ايتىلادى. ول مۇنى الاشورداشىل ازامات، كارلاگتا قاماۋدا وتىرعان داموللا بيتىلەۋوۆتى تەرگەگەن كەزىندە انىقتاعان. تەرگەۋ بارىسىندا داموللا بيتىلەۋوۆ احمەت بايتۇرسىن ۇلى، ءمىرجاقىپ دۋلاتوۆ جانە باسقا دا الاشورداشىلارمەن قارىم- قاتىناسى جايىندا ايتا وتىرىپ، ۋايدا بايبەكوۆپەن ەكەۋى جۇسىپبەك ايماۋىتوۆتىڭ ولەڭى جايىندا اڭگىمەلەسكەنىن تىلگە تيەك ەتكەن. اباقتىدا جازىلعان شىعارما سوتتالۋشىلار اراسىندا تاراپ كەتكەن. داموللا بيتىلەۋوۆ ولەڭدى ۋايدا بايبەكوۆكە ايتىپ بەرەدى. ءوز كەزەگىندە ۋ. بايبەكوۆ ونى قاعازعا تۇسىرەدى.

1933 -جىلدىڭ 14-ماۋسىمىندا يسماعامبەت ماكىشوۆ پەن نۇرعالي كادالەنكونى تەرگەۋ ءىسى بويىنشا ايىپتالۋشىلاردى بەتتەستىرىپ، حاتتاما تولتىرىلادى. سول حاتتامادا ي. ماكىشوۆ ن. كادالەنكونىڭ وتىنۋىمەن داموللا بيتىلەۋوۆتەن شىعارمانى الىپ، ونى كادالەنكوعا بەرگەنىن ايتقان. بيتىلەۋوۆ تۋىندىنى كارلاگتا وتىرعان سوتتالۋشىلاردىڭ اراسىندا ناسيحاتتاپ جۇرگەن»، - دەپ جازادى مەملەكەتتىك كەڭەسشى.

ايتا كەتەرلىگى، شىعارما ءۇش بولىكتەن تۇرادى. قازىردىڭ وزىندە عالىمدار ولەڭنىڭ مازمۇنىن 20-جىلدارداعى ءداستۇرلى پوەزيانىڭ ستيلىنە جۋىقتايتىنىن ايتىپ وتىر.

سوندىقتان تۋىندىعا فيلولوگيالىق ساراپتاما جاساۋ ءۇشىن پرەزيدەنت ارحيۆىنىڭ جانىنان ادەبيەت جانە ونەر ينستيتۋتىنىڭ ماماندارى مەن ايماۋىتوۆتانۋشى عالىمداردان قۇرالعان ارنايى توپ جاساقتالدى. عالىمدار تولىق زەرتتەپ، ورتاق تۇجىرىمعا كەلگەننەن كەيىن ونىڭ قورىتىندىسى قوسىمشا جاريالاناتىن بولادى.

ەسكە سالا كەتسەك، تۇركىستاندا وتكەن ۇلتتىق قۇرىلتايدا پرەزيدەنت قاسىم- جومارت توقايەۆ

جاقىندا تابىلعان جۇسىپبەك ايماۋىت ۇلىنىڭ تىڭ شىعارماسىنا قاتىستى پىكىر بىلدىرگەن ەدى.