روبوت پوليتسەيلەر سينگاپۋر اۋەجايىن پاترۋلدەپ ءجۇر

None
سينگاپۋر. قازاقپارات - بويى 210 س م اساتىن جانە اينالاسىن 360 گرادۋستا بارلاپ، انىق كورە الاتىن روبوتتار كەز كەلگەن زاڭبۇزۋشىنى ارام ويىنان اينىتۋى مۇمكىن.

دەگەنمەن ولاردىڭ اراسىندا Robocop جوق، دەپ حابارلايدى قازاقپارات CNN اگەنتتىگىنە سىلتەمە جاساپ.

بۇل - سينگاپۋر پوليتسياسى بەس جىلدان استام سىناقتان وتكىزىپ، چانگي اۋەجايىن پاترۋلدەۋگە جىبەرگەن ەكى روبوت.

ولار الداعى جىلدارى وفيتسەرلەرگە كومەكتەسۋ ءۇشىن قالا- مەملەكەتتىڭ كوشەلەرىن پاترۋلدەيدى دەپ جوسپارلانىپ وتىر.

ءساۋىر ايىنان بەرى اۋەجايدا پاترۋلدىك قىزمەت اتقارعان روبوتتار پوليتسيانىڭ جەرگىلىكتى جەردەگى «كوزى مەن قۇلاعىنا» اينالعان.

ءبىر جاعداي بولعاندا روبوتتار سول جەردى قورشاپ، پوليتسيانىڭ كەلۋىن كۇتەدى جانە جارقىلداپ، سيرەنا مەن ديناميكتىڭ كومەگىمەن اينالاداعى ادامدارعا ەسكەرتۋ جاساي الادى.

ادامدار روبوتتىڭ الدىڭعى جاعىنداعى تۇيمەنى باسىپ، پوليتسيامەن تىكەلەي بايلانىسا الادى.

سينگاپۋر پوليتسياسى جۇما كۇنى قالا شتاتىندا روبوتتار بىرتىندەپ كوبەيەدى دەپ مالىمدەدى.

«روبوتوتەحنيكانى ىسكە قوسۋ - الدىڭعى قاتارداعى قىزمەتكەرلەرىمىزدىڭ وپەراتسيالىق تيىمدىلىگى مەن مۇمكىندىكتەرىن جاقسارتادى، ولاردىڭ ءوز مىندەتتەرىن دۇرىس ورىنداۋىنا جاعداي جاسايدى»،-دەيدى اۋەجاي پوليتسياسىنىڭ باستىعى جانە وپەراتسيالىق وفيتسەر ليم كە ۆەي.

ءار روبوتتا اۋديوحابارلاما تاراتاتىن كىرىستىرىلگەن ديناميك جانە كورنەكى حاباردى كورسەتەتىن پانەل بار.

بيىكتىگى - شامامەن 1,7 مەتر (5,5 فۋت)، ءبىراق بارىنشا ۇزارتقاندا 2,3 مەترگە (7,5 فۋت) دەيىن جەتەدى.

سونداي- اق ولار 360 گرادۋستىق بىرنەشە كامەرامەن جابدىقتالعان، بۇل اۋەجاي پوليتسياسىنا اعىمداعى جاعدايدى باسقارۋ ءۇشىن «كەدەرگىسىز كورىنىس» الۋعا مۇمكىندىك بەرەدى.

بۇل - 5 ميلليوننان استام حالقى بار، تەحنولوگيانى جاقسى مەڭگەرگەن ەلدە ازاماتتىق مىندەتتەرگە قولدانىلاتىن سوڭعى ۇلگىدەگى روبوتتار.

روبوتتىڭ بۇرىنعى نۇسقالارى 2018 جانە 2022 -جىلدارى قوعامدىق شەرۋدە قولدانىلعان.

كوروناۆيرۋس كەزىندە روبوت-يتتەر الەۋمەتتىك قاشىقتىقتى قاتاڭ ساقتاۋعا كومەك بەردى، ال تازالاپ-جيناۋشى روبوتتار بۇكىل ەلدەگى مەترو ستانسالارىندا، سونداي- اق اۋەجايلاردا كوز ۇيرەنگەن كورىنىسكە اينالدى.

سونىمەن قاتار، كولىك قىزمەتكەرلەرى ۇشاتىن تاكسيلەر بار بولعانى ەكى جىلدان كەيىن شىندىققا اينالادى دەپ ۇمىتتەنىپ وتىر.

ءبىراق روبوتتار سالىستىرمالى تۇردە كەڭ تاراعان ەلدە دە حالىقتىڭ جاڭا كەلگەن «پوليتسيا قىزمەتكەرلەرىنە» ۇيرەنۋىنە ءبىراز ۋاقىت قاجەت بولۋى مۇمكىن.


سوڭعى جاڭالىقتار