ەرلان قارين: پرەزيدەنت جاڭا يدەولوگيالىق ستراتەگيانى ىسكە اسىرۋدىڭ ناقتى قادامدارىن ۇسىندى

None
استانا. قازاقپارات - پرەزيدەنت ەلىمىزدىڭ جاڭا يدەولوگيالىق ستراتەگياسىن ىسكە اسىرۋدىڭ ناقتى قادامدارىن ۇسىندى. مەملەكەتتىك كەڭەسشى ەرلان قارين تەلەگرام كانالىندا وسىنداي پىكىر ءبىلدىردى، دەپ حابارلايدى قازاقپارات.

«پرەزيدەنت قاسىم-جومارت توقايەۆ ۇلتتىق قۇرىلتايدا سويلەگەن سوزىندە قوعامنىڭ رۋحاني دامۋىنىڭ پەرسپەكتيۆالارى مەن تۇجىرىمدامالىق باعدارىن عانا ايقىنداپ بەرگەن جوق. سونىمەن قاتار، ەلىمىزدىڭ جاڭا يدەولوگيالىق ستراتەگياسىن ىسكە اسىرۋدىڭ ناقتى قادامدارىن ۇسىندى»، - دەيدى ەرلان قارين.

مەملەكەتتىك كەڭەسشى بۇل ارادا نەگىزگى بىرنەشە باعىتتى اتاپ وتەدى.

«بىرىنشىدەن، مەملەكەت باسشىسى ۇلتتىڭ جاڭا ساپاسىن قالىپتاستىرۋدى، ۇلتتىق قۇندىلىقتاردى ودان ءارى دامىتۋدى، حالقىمىزدىڭ بىرەگەيلىگىن نىعايتۋدى يدەولوگيالىق جۇمىستىڭ باستى باسىمدىقتارى رەتىندە ايقىنداپ بەردى.

ەكىنشىدەن، قاسىم-جومارت توقايەۆ پرەزيدەنت قىزمەتىنە كىرىسكەن ساتتەن باستاپ تاۋەلسىزدىك مۇراتتارى جانە پاتريوتيزم، ەڭبەك پەن ءبىلىم كۋلتى، قۇقىق پەن ءتارتىپ، ادامگەرشىلىك پەن جاۋاپكەرشىلىك سەكىلدى قۇندىلىقتاردى ماقساتتى تۇردە العا تارتىپ كەلەدى. ەندى پرەزيدەنت بۇل قۇندىلىقتاردى» ادىلەتتى قازاقستان - بەرەكەلى قوعام - ادال ازامات«اتتى ءبىرىڭعاي تۇجىرىمداماعا بىرىكتىرىپ وتىر.

قوعامنىڭ جاڭا ادەبىن قالىپتاستىرۋ باعىتىنداعى جۇمىس وتە اۋقىمدى. ونى جۇزەگە اسىرۋعا مەملەكەت تە، تۇتاس قوعام دا، ەلىمىزدىڭ ءاربىر ازاماتى دا جاۋاپكەرشىلىكپەن قاراۋى قاجەت.

ۇشىنشىدەن، مەملەكەت باسشىسى ءبىلىم، عىلىم، مادەنيەت سالالارى بويىنشا ناقتى جوبالار ۇسىندى. ال بۇل - ەلىمىزدىڭ يدەولوگيالىق باعىتىن دامىتۋدىڭ ناقتى باعدارلاماسى.

سونىمەن قاتار، ۇلتتىڭ جاڭا ساپاسىن قالىپتاستىرۋ جونىندەگى باستامالاردى تەز ارادا ىسكە اسىرۋ مۇمكىن ەمەس. وسىلايشا، پرەزيدەنت ەل دامۋىنىڭ ۇزاق مەرزىمدى كۇن ءتارتىبىن بەلگىلەپ بەردى.

تورتىنشىدەن، اتالعان باستامانىڭ جۇرتشىلىققا ۇسىنىلعان ۋاقىتىن دا ەرەكشە اتاپ وتكەن ءجون. ءبىز ءقازىر ساياسي رەفورمالاردىڭ باسىم بولىگىن جۇزەگە اسىرۋدى اياقتاپ، ەكونوميكادا ۇلكەن وزگەرىستەردى باستايتىن ساتتە تۇرمىز. سوندىقتان، پرەزيدەنتتىڭ قوعامدىق قۇندىلىقتاردى نىعايتۋ تۋرالى باستاماسى دەر كەزىندە كوتەرىلىپ وتىر.

جالپى العاندا، ءبىز پرەزيدەنت رەفورمالارىنىڭ ءۇش باعىتتاعى ۇيلەسىمدىلىگىن كورىپ وتىرمىز: ساياسات، ەكونوميكا، يدەولوگيا»، - دەدى ول.

سوڭعى جاڭالىقتار