ۇلتتىق قۇرىلتاي - «حالىق ۇنىنە قۇلاق اساتىن مەملەكەت» جوباسىنىڭ جارقىن كورىنىسى - شەرزود پۋلاتوۆ

تۇركىستان. قازاقپارات - ۇلتتىق قۇرىلتاي قارساڭىندا جۇمىس سەكسيالارىنىڭ وتىرىسى ءوتتى. جيىنعا قاتىسقان استانا قالاسى «وزبەك ەتنومادەني ورتالىعى» قوعامدىق بىرلەستىگىنىڭ ءتوراعاسى شەرزود پۋلاتوۆ مەملەكەتتى ءتىلدى دامىتىپ، ەرەكشە مارتەبە بەرۋ كەرەكتىگىن جەتكىزدى، دەپ حابارلايدى قازاقپارات ءتىلشىسى.

«مەن قازاقستان حالقى اسسامبلەياسىنىڭ مۇشەسىمىن. ەل بىرلىگىن ساقتاۋ ىسىندە اسسامبلەيا كوپتەگەن جۇمىس اتقاردى. بارشا ۇلتتىڭ باسىن قوستى. ءبىز ارمەن قاراي وسى بىرلىگىمىزدى ساقتاۋىمىز قاجەت. بىرلىك - ءبىزدىڭ ۇلتتىق ماسەلەمىز. وسى باعىتتا مەملەكەتتى ءتىلدى دامىتىپ، ەرەكشە مارتەبە بەرۋىمىز كەرەك»، - دەدى ول.

سونداي-اق مەملەكەت باسشىسىنىڭ «حالىق ۇنىنە قۇلاق اساتىن مەملەكەت» جوباسى ۇلتتىق قۇرىلتايدان ايقىن كورىنىس تاۋىپ وتىرعانىن اتاپ ءوتتى.

«حالىق ۇنىنە قۇلاق اساتىن مەملەكەت جوباسىنىڭ نەگىزىن ۇلتتىق قۇرىلتايدان كورىپ وتىرمىن. سەبەبى قۇرىلتاي مۇشەلەرى حالىقتىڭ ورتاسىنان شىققان ازاماتتار، ولار حالىقپەن ءارقاشان تىعىز بايلانىستا جۇمىس ىستەيدى. حالىق مۇددەسىن وسىنداي الاڭداردا كوتەرىپ، شەشىلۋىنە ۇلەس قوسىپ كەلەدى»، - دەدى شەرزود پۋلاتوۆ.