ءورت قايتا ءورشىدىمە: ت ج م اباي وبلىسى ماڭىنداعى قويۋ تۇتىنگە تۇسىنىك بەردى

وسكەمەن. قازاقپارات – ق ر توتەنشە جاعدايلار مينيسترلىگى اباي وبلىسى ءشۇلبى كەنتىنىڭ ماڭىنداعى قويۋ تۇتىنگە قاتىستى جاۋاپ بەردى، دەپ حابارلايدى قازاقپارات ءتىلشىسى.

بۇگىن Telegram-ارنالاردىڭ بىرىندە اباي وبلىسىندا ءورت قايتا ءورشىپ، ءشۇلبى كەنتىنىڭ ماڭىن قويۋ ءتۇتىن باسقانى جايلى ۆيدەو تارادى.

وسىعان بايلانىستى توتەنشە جاعدايلار مينيسترلىگىنىڭ باسپا ءسوز قىزمەتى جاۋاپ بەردى: «ۆيدەو ءشۇلبى كەنتىنىڭ ماڭىندا تۇسىرىلگەن. بۇل جاڭادان شىققان ءورت ەمەس. وقشاۋلانعان ءورتتى ءسوندىرۋ جۇمىستارى جۇرگىزىلىپ جاتىر. قازىرگى جاعدايدى ەسكەرە وتىرىپ، كۇشتەر مەن قۇرالدار قايتا توپتاستىرىلعان. توتەنشە جاعدايلار ءمينيسترى سول جاقتا ءجۇر. جاعداي تولىعىمەن باقىلاۋدا»، - دەپ حابارلادى مينيسترلىكتىڭ باسپا ءسوز قىزمەتىنەن.

ۆەدومستۆو دەرەگىنشە، ءورتتىڭ وقشاۋلانۋى - بۇل ءورتتى ءسوندىرۋ ساتىسى.

«وسى كەزدە ەلدى مەكەندەرگە قاۋىپ تونبەيدى، ءورتتىڭ تارالۋى توقتاتىلادى جانە قولدا بار كۇشتەر مەن قۇرالدار ونى تولىقتاي سوندىرۋگە جۇمىلدىرىلادى. «سەمەي ورمان» تابيعي رەزەرۆاتى اۋماعىندا تابيعي ءورت تولىق وشىرىلگەنگە دەيىن تۇراقتى تۇردە اەروۆيزۋالدى باقىلاۋ جۇرگىزىلۋدە»، - دەلىنگەن اقپاراتتا.

ەسكە سالايىق، «سەمەي ورمانى» تابيعي رەزەرۆاتى اۋماعىنداعى ءورت 8-ماۋسىمدا تۇتانعان بولاتىن. سالدارىنان وتپەن كۇرەسكە جۇمىلدىرىلعان 14 ورمانشى قازا بولدى.

14-ماۋسىمدا ءورتتىڭ تارالۋى توقتاتىلدى.

15-ماۋسىم كۇنى توتەنشە جاعدايلار ءبىرىنشى ۆيتسە- ءمينيسترى يبراگيم كۇلشىمبايەۆ ءورت 4-5 كۇندە اۋىزدىقتالۋى مۇمكىن ەكەنىن ايتتى.